پاکستانی اداکارہ ثروت گیلانی نے انکشاف کیا ہے کہ بالی ووڈ سپر اسٹار عامر خان لیجنڈری اداکار و کامیڈین معین اختر کی صلاحیتوں کے اس قدر معترف تھے کہ انہوں نے ان کے مقبول پروگرام ’لوز ٹاک‘ کی مکمل اقساط بھیجنے کا مطالبہ کیا تھا۔
ایک حالیہ انٹرویو میں ثروت گیلانی نے بتایا کہ ویب سیریز ’چڑیلز‘ کی بین الاقوامی سطح پر ریلیز کے بعد ان کا رابطہ کئی بھارتی شخصیات سے ہوا اور اسی دوران عامر خان کی پروڈکشن ٹیم کے ایک رکن کے ذریعے ان کی بالی ووڈ اداکار سے بھی بات ہوئی۔
اداکارہ کے مطابق جب انہیں معلوم ہوا کہ عامر خان کی ٹیم ان سے رابطہ کر رہی ہے تو انہوں نے سوچا کہ شاید بالی ووڈ اسٹار انہیں کسی ہندی فلم میں کام کی پیشکش کرنا چاہتے ہیں مگر اصل وجہ سامنے آئی تو معاملہ کچھ اور ہی نکلا۔
ثروت گیلانی کے مطابق عامر خان دراصل معین اختر کے مشہور پروگرام ’لوز ٹاک‘ کی تمام اقساط حاصل کرنا چاہتے تھے۔ ساتھ ہی انہوں نے معین اختر کی غیر معمولی ورسٹائل اداکاری کی بھی تعریف کی اور کہا کہ انہوں نے ایسا فنکار نہیں دیکھا جو اتنی مہارت سے مختلف حلیے اور کردار نبھا سکے۔
