ایران کی سپریم نیشنل سکیورٹی کونسل کے سیکریٹری محسن رضائی نے کہا ہے کہ امریکی اقدامات نے دنیا میں جوہری ہتھیار حاصل کرنے کی خواہش کو مزید بڑھا دیا ہے.
ایران کی سپریم نیشنل سکیورٹی کونسل کے سیکریٹری محسن رضائی نے امریکی صدر ڈونلڈ ٹرمپ کی ایران کے خلاف فوجی کارروائیوں اور پالیسیوں کو شدید تنقید کا نشانہ بناتے ہوئے کہا ہے کہ ان اقدامات نے دنیا میں جوہری ہتھیار حاصل کرنے کی خواہش کو مزید بڑھا دیا ہے۔
میڈیا رپورٹس کے مطابق محسن رضائی کا کہنا تھا کہ ایران پر حملے نے بعض ممالک کو یہ سوچنے پر مجبور کیا ہے کہ اگر کسی ملک کے پاس جوہری صلاحیت نہ ہو تو وہ بیرونی فوجی حملوں سے خود کو محفوظ رکھنے میں زیادہ کمزور ہوسکتا ہے۔
انہوں نے خاص طور پر اس بات کی طرف اشارہ کیا کہ ایران کا جوہری عدم پھیلاؤ کے عالمی نظام میں شامل ہونا بھی اسے امریکی حملے سے نہیں بچا سکا۔
انہوں نے کہا کہ ٹرمپ کی پالیسیوں نے "جوہری سلامتی" کے بجائے "جوہری عدم تحفظ" پیدا کیا ہے۔ ان کا مؤقف ہے کہ موجودہ صورتحال عالمی سطح پر جوہری ہتھیاروں کے پھیلاؤ کے رجحان کو تقویت دے سکتی ہے۔
