جامعہ کراچی کے طلبا کیلئے اے سی سی اے نے فیسوں میں کمی کر دی

پیشہ ور تعلیمی انجمن کے تعاون سے طلبا کی مہارت بڑھے گی، ڈاکٹر قیصر، مفاہمت جامعہ اور ادارے کی مستحسن کوشش ہے، ریحان الدین فوٹو: فائل

---

KARACHI: جامعہ کراچی اور اے سی سی اے ایسوسی ایشن آف چارٹرڈ سرٹیفائیڈ اکاؤنٹینٹس کے مابین کامرس گریجویٹ کو اے سی سی اے کرنے کے لیے نصاب اورفیس میں غیرمعمولی رعایت دینے کا معاہدہ طے پاگیا ہے۔

معاہدے کے تحت ایسوسی ایشن آف چارٹرڈ سرٹیفائیڈ اکاؤنٹینٹس جامعہ کراچی سے کامرس کے شعبہ میں بی ایس اور ماسٹر کرنے والے طلبہ وطالبات کو اے سی سی اے کرنے پر نصاب میں شامل مضامین میں سے 4 کورسز کی رعایت دینے پر راضی ہوگیا ہے، اے سی سی اے کرنے والے طلبا اے سی سی اے کرنے کیلیے 14 کے بجائے 10 کورسز پر اے سی سی اے کی سندحاصل کرسکیں گے، ادارہ ان کورسز کی مطلوبہ فیس، رجسٹریشن فیس اوردیگر فیسوں میں رعایت کیلیے تیار ہے ۔

جامعہ کراچی کے طلبا کو 80 ہزار روپے کی رعایت دی جائے گی، اس سلسلے میں پیرکو شعبہ کامرس جامعہ کراچی اور ایسوسی ایشن آف چارٹرڈ سرٹیفائیڈ اکاؤنٹینٹس کے درمیان مفاہمتی یادداشت پر دستخط ہوئے ، مفاہمتی یادداشت کی تقریب سے وائس چانسلر ڈاکٹر محمد قیصر، اے سی سی اے کے ریجنل ہیڈ ریحان الدین نے خطاب کیا، ڈاکٹر قیصر نے کہا کہ دورجدید میں مالیاتی شعبہ کسی بھی ادارے کی ترقی اور استحکام میں کلیدی حیثیت رکھتا ہے مالیاتی مینجمنٹ کے بغیر کوئی بھی ادارہ اپنے مقررہ اہداف حاصل نہیں کرسکتا، جامعات اور پیشہ ور تعلیمی ایسوسی ایشن کے درمیان تعاون سے طلبہ و طالبات کی مہارتوں میں بہتری آئے گی مفاہمتی یادداشت اسی سمت میں ایک اہم قدم ہے۔

اے سی سی اے کے ریجنل ہیڈ ریحان الدین نے کہا کہ یہ یادداشت جامعہ اور ان کی ایسوسی ایشن کے درمیان مستحکم اورمستقل رابطے کی ایک مستحسن کوشش ہے، 90 ممالک میں ہمارے 180 دفاتر ہیں جو طلبا کی صلاحیتوں کو نکھارتے ہیں، فیکلٹی آف مینجمنٹ اینڈ ایڈمنسٹریٹو سائنسز ڈاکٹر خالد عراقی نے جامعہ کے تدریسی شعبوں اور پیشہ ورانجمنوں کے مابین روابط کو فروغ دینے پر زور دیتے ہوئے کہا کہ طلبا کو جدید نصاب کی ضرورت ہے جو مستقبل کی مارکیٹ کے تقاضوں کو بخوبی پورا کر سکے۔

اس وقت 8500 رجسٹرڈ طلبا ادارے میں مستفید ہونے کے منتظر ہیں، سیمینارز، کانفرنسوں کے انعقاد سے جامعہ کراچی اور اے سی سی اے میں تعاون کو فروغ حاصل ہوگا، شعبہ کامرس کے صدر نشین ڈاکٹر طاہر علی نے کہا کہ ہماری کوشش ہے کہ کامرس گریجویٹ جدید تعلیم اور تربیت سے پروفیشنل ذمے داریوں سے عہدہ براں ہوسکیں۔