ہالی ووڈ کے معروف اداکار اور مارول اسٹار رابرٹ ڈاؤنی جونیئر نے اپنی اہلیہ سوزن ڈاؤنی کے ساتھ شادی کی 21ویں سالگرہ مناتے ہوئے ان کیلئے محبت بھرا پیغام شیئر کر دیا۔
رابرٹ ڈاؤنی جونیئر نے 27 اگست کو انسٹاگرام پر خصوصی پوسٹ شیئر کرتے ہوئے اپنی کامیابیوں اور زندگی میں اہلیہ کے کردار کو سراہا اور انہیں اپنی زندگی کی اہم ساتھی قرار دیا۔
اداکار نے پوسٹ کے ساتھ دو تصاویر بھی شیئر کیں جن میں سے ایک میں بادشاہ اور ملکہ کے تاش کے پتوں کے ساتھ ان کی پالتو بلی مونٹی دکھائی دی جبکہ دوسری تصویر میں جوڑے کو ایک دوسرے کو گلے لگاتے ہوئے دکھایا گیا۔
رابرٹ ڈاؤنی جونیئر اور سوزن کی پہلی ملاقات 2003 کی فلم ’گوتھیکا‘ کے سیٹ پر ہوئی تھی جہاں سوزن بطور پروڈیوسر جبکہ رابرٹ بطور اداکار کام کر رہے تھے۔ دونوں نے نومبر 2003 میں منگنی کی اور 27 اگست 2005 کو نیویارک میں شادی کے بندھن میں بندھ گئے۔
