کراچی:
ناظم آباد میں نومولود بچے کی گمشدگی کے معاملے پر انکوائری کیلئے سندھ ہیلتھ کیئر کمیشن کو تاحال تفتیش افسر کی جانب سے درخواست موصول نہیں ہوئی۔
سندھ ہیلتھ کیئر کمیشن کے سی ای او احسن قوی کا کہنا ہے کہ پولیس کے تفتیشی افسر سے رابطے میں ہیں، پولیس اپنی کاروائی مکمل کرنے کے بعد ہمیں درخواست بھیجے گی۔
احسن قوی نے کہا کہ امکان ہے آج ہمیں درخواست موصول ہوجائے، درخواست ملنے کے بعد ہیلتھ کیئر کمیشن اپنی کارروائی کا آغاز کرے گا، ہیلتھ کیئر کمیشن تمام تر ریکارڈز کا جائزہ لے گا۔
انہوں نے کہا کہ تمام تر میڈیکل رپورٹس کا جائزہ لینے کے بعد ہیلتھ ایکسپرٹ کا پینل تشکیل دیا جائے گا، ہیلتھ ایکسپرٹ پینل میں مختلف اسپتال کے ماہر شامل کیے جائیں گے۔
احسن قوی کے مطابق ہیلتھ ایکسپرٹ پینل بننے کے بعد نجی اسپتال اور لواحقین کو بلایا جائے گا، دونوں کے بیان اور تمام تر میڈیکل رپورٹ کی روشنی میں فیصلہ کیا جائے گا۔
