متحدہ عرب امارات میں اونٹ دوڑ محض ایک روایتی کھیل نہیں بلکہ ملکی شناخت اور صحرائی ثقافت کا اہم حصہ سمجھی جاتی ہے، جو نئی نسل کو ماضی کی روایات اور آباؤ اجداد کی اقدار سے جوڑتی ہے۔
غیر ملکی میڈیا رپورٹ کے مطابق اماراتی معاشرے میں نسلوں سے اونٹوں کو خاص مقام حاصل ہے جبکہ اونٹ دوڑ صبر، عزم، سخاوت اور اپنی سرزمین سے وابستگی کی علامت بن چکی ہے۔ جدید دور میں متحدہ عرب امارات نے اس روایتی کھیل کو جدید سہولیات اور منظم نظام کے ساتھ فروغ دیتے ہوئے اس کی ثقافتی حیثیت بھی برقرار رکھی ہے۔
ملک میں جدید ریسنگ ٹریکس، خصوصی مراکز، بڑے مقابلوں، ویٹرنری سہولیات اور ادارہ جاتی نظام کے ذریعے اونٹ دوڑ کو باقاعدہ کھیل اور ثقافتی سرگرمی کے طور پر ترقی دی گئی ہے۔ دبئی کا المرموم اور ابوظبی کا الوثبہ اس حوالے سے نمایاں مراکز ہیں۔
اونٹ دوڑ کو عالمی سطح پر بھی پذیرائی حاصل ہوئی ہے اور متحدہ عرب امارات کے ثقافتی ورثے کے مختلف عناصر، جن میں اونٹ دوڑ بھی شامل ہے، یونیسکو کی غیر مادی ثقافتی ورثے کی فہرستوں میں شامل ہیں۔
متحدہ عرب امارات اب ٹیکنالوجی اور مصنوعی ذہانت کے ذریعے بھی اونٹ دوڑ کے ورثے کو محفوظ بنانے اور دنیا بھر میں متعارف کرانے کے نئے امکانات پر توجہ دے رہا ہے۔
