پاکستان کے خلاف تیسرے ٹیسٹ میچ کی آخری اننگز کے پہلے ہی اوور میں دو وکٹیں گنوانے کے باوجود انگلینڈ جیت کے انتہائی نزدیک پہنچ گیا۔
برمنگھم میں کھیلے جارہے میچ کے چوتھے روز پاکستان نے جارحانہ انداز میں آغاز کرتے ہوئے دونوں انگلش اوپنرز کو پہلے ہی اوور میں پویلین واپس بھیج دیا۔
انگلینڈ نے پاکستان کے 130 رنز کے ہدف کے تعاقب میں بیٹنگ کا آغاز کیا تو پہلی ہی گیند پر بین ڈکٹ اور اسی اوور کی آخری گیند پر ایمیلیو گے بغیر کوئی رن بنائے آؤٹ ہوگئے۔
35 کے مجموعی اسکور پر کپتان جو روٹ محمد علی کی گیند پر بولڈ ہوگئے تاہم نو بال کے باعث انہیں نئی زندگی مل گئی۔
54 کے مجموعی اسکور پر جو روٹ کو ایک اور موقع ملا جب محمد عباس کی گیند پر ایج لگ کر گیند پہلی اور دوسری سلپ کے درمیان سے گزرگئی اور سلپ پر موجود فیلڈرز نے کیچ پکڑنے کی کوشش ہی نہیں کی۔
بعد ازاں انہوں نے جارڈن کوکس کے ساتھ مل کر انگلینڈ کو جیت کے نزدیک پہنچا دیا۔
انگلینڈ کو جیت کے لیے مزید 40 رنز درکار ہیں جبکہ پاکستان کو مزید آٹھ وکٹیں حاصل کرنی ہیں۔
گزشتہ روز ڈیبیوٹنٹ رضا اللہ نے ریکارڈ ساز 81 رنز کی اننگز کھیل کر محمد عباس (42) کے ہمراہ نویں وکٹ کے لیے 121 رنز کی تاریخی شراکت قائم کرکے پاکستان کو اننگز کی یقینی شکست سے بچایا تھا۔
پاکستان نے دوسری اننگز میں 449 رنز بنائے تھے اور انگلینڈ کو جیت کے لیے 130 رنز کا ہدف دیا تھا۔
واضح رہے کہ انگلینڈ کو تین ٹیسٹ میچز کی سیریز میں 0-2 کی ناقابل شکست برتری حاصل ہے۔
