عمر بڑھنے کے ساتھ جلد میں بھی مختلف تبدیلیاں آنا معمول ہے۔ جھریوں کے ساتھ بعض افراد کے چہرے، ہاتھوں، بازوؤں، ٹانگوں یا کندھوں پر بھورے یا سیاہ دھبے بھی نمایاں ہونے لگتے ہیں، جنہیں عام طور پر ’’عمر کے دھبے‘‘ کہا جاتا ہے۔
یہ دھبے عموماً ہائپرپیگمنٹیشن کی ایک شکل ہوتے ہیں، جس میں جلد کے قدرتی رنگت پیدا کرنے والے مادے میلانن کی مقدار بڑھنے سے جلد کے کچھ حصے زیادہ گہرے دکھائی دینے لگتے ہیں۔ عام طور پر ایسے دھبے خطرناک نہیں ہوتے، تاہم جلد میں غیر معمولی تبدیلی کو نظر انداز نہیں کرنا چاہیے۔
اگر کوئی دھبہ اچانک دوسرے دھبوں کے مقابلے میں زیادہ سیاہ ہوجائے، اس کے گرد سیاہ حلقہ بننے لگے، اس کا سائز مسلسل بڑھ رہا ہو یا وہ سرخی مائل ہونے لگے تو ڈاکٹر سے مشورہ کرنا بہتر ہے۔
ماضی میں شائع ہونے والی ایک گھریلو ترکیب میں عمر کے دھبوں کو ہلکا کرنے کے لیے پیاز اور سیب کے سرکے کا استعمال تجویز کیا گیا تھا۔
اس ترکیب کے مطابق پیاز کے رس کو جلد کے لیے مفید قرار دیا جاتا ہے جبکہ سیب کے سرکے کے بارے میں کہا گیا ہے کہ اس میں موجود تیزابی خصوصیات جلد کی بیرونی مردہ تہہ کو ہٹانے میں مدد دے سکتی ہیں۔
استعمال کا طریقہ
ایک پیاز کو باریک پیس کر اس کا گودا تیار کریں۔ پھر اسے سوتی کپڑے یا باریک چھلنی میں ڈال کر اچھی طرح نچوڑیں تاکہ رس الگ ہوجائے۔
اس پیاز کے رس میں سیب کا سرکہ ملا کر متاثرہ جگہوں پر لگانے کی تجویز دی گئی ہے۔ اس عمل کو تقریباً دو ہفتے تک روزانہ دہرانے کا مشورہ دیا جاتا ہے۔
البتہ پیاز اور سرکہ دونوں جلد میں جلن پیدا کرسکتے ہیں، اس لیے استعمال سے پہلے جلد کے ایک چھوٹے حصے پر آزمائش کرنا بہتر ہے، اور جلن یا سرخی کی صورت میں استعمال روک دینا چاہیے۔
