لندن: سعودی عرب کی اہم ایسٹ ویسٹ آئل پائپ لائن کی بندش اور توانائی کے انفرااسٹرکچر پر تازہ حملوں کے باعث عالمی منڈی میں تیل کی قیمتیں ایک بار پھر بڑھ گئی ہیں۔
رائٹرز کے مطابق سپلائی میں ممکنہ رکاوٹ کے خدشات برقرار رہنے سے منگل کو برینٹ خام تیل کے سودے 1.37 ڈالر یعنی 1.3 فیصد اضافے کے بعد 107.05 ڈالر فی بیرل ہوگئے۔
امریکی ویسٹ ٹیکساس انٹرمیڈیٹ خام تیل کی قیمت بھی 1.53 ڈالر یعنی 1.51 فیصد بڑھ کر 102.92 ڈالر فی بیرل ہوگئی۔
دونوں عالمی بینچ مارک گزشتہ کاروباری سیشن میں بھی ایک فیصد سے زیادہ مہنگے ہوئے تھے۔
سعودی توانائی کے بنیادی ڈھانچے پر حملوں کے بعد ایسٹ ویسٹ پائپ لائن کے بند ہونے سے عالمی مارکیٹ میں خام تیل کی سپلائی کے حوالے سے خدشات مزید بڑھ گئے ہیں۔
رپورٹ کے مطابق خلیج میں بحری آمدورفت سے متعلق خطرات کم کرنے کی سفارتی کوششوں کے باوجود خطے میں تازہ حملوں نے سرمایہ کاروں کے خدشات برقرار رکھے ہیں۔ اگر سپلائی میں رکاوٹ طویل ہوتی ہے تو عالمی مارکیٹ میں تیل کی قیمتوں پر مزید دباؤ آسکتا ہے۔
