گھر کی صفائی کے باوجود اگر بجلی کے سفید سوئچ پیلے، چکنے اور میلے دکھائی دیں تو پورے گھر کا لُک خراب ہو سکتا ہے۔
روزانہ ہاتھ لگنے سے سوئچ بورڈ پر دھول، چکنائی اور انگلیوں کے نشانات جمع ہوتے رہتے ہیں۔
چند عام گھریلو چیزوں سے ان کی بیرونی سطح صاف کی جا سکتی ہے:
سب سے پہلے بجلی بند کریں
صفائی شروع کرنے سے پہلے متعلقہ سوئچ بورڈ کی بجلی کی فراہمی بند کرنا ضروری ہے۔ پانی، صفائی کا محلول یا کوئی بھی مائع براہِ راست سوئچ پر نہ چھڑکیں اور نمی کو اندر جانے سے روکیں۔
ٹوتھ پیسٹ سے ہلکے داغ صاف کریں
سوئچ زیادہ گندا نہ ہو تو نرم کپڑے یا پرانے نرم ٹوتھ برش پر تھوڑی مقدار میں ٹوتھ پیسٹ لگا کر صرف بیرونی سطح کو آہستگی سے صاف کیا جا سکتا ہے۔ بعد میں باقی ٹوتھ پیسٹ خشک کپڑے سے مکمل طور پر صاف کر دیں۔
ضدی میل کیلئے بیکنگ سوڈا
پرانے اور جمے ہوئے داغوں کیلئے تھوڑے سے بیکنگ سوڈا میں معمولی پانی ملا کر گاڑھا پیسٹ بنایا جا سکتا ہے۔ اسے براہِ راست سوئچ پر لگانے کے بجائے کپڑے یا برش پر معمولی مقدار لے کر بیرونی سطح صاف کریں اور فوراً خشک کپڑے سے باقی مواد ہٹا دیں۔
نیل پالش ریموور استعمال کرتے وقت احتیاط
چپچپے اور سخت داغوں کیلئے بعض لوگ نیل پالش ریموور استعمال کرتے ہیں لیکن یہ بعض اقسام کے پلاسٹک کو خراب یا بے رنگ کر سکتا ہے۔ اس لیے پہلے کسی چھوٹے اور کم نمایاں حصے پر آزمائیں اور اسے کبھی سوئچ کے اندر نہ جانے دیں۔
نوٹ:
اگر سوئچ سے چنگاری نکل رہی ہو، جلنے کے نشان ہوں، سوئچ ڈھیلا ہو یا غیر معمولی طور پر گرم ہوتا ہو تو صفائی کے بجائے ماہر الیکٹریشن سے معائنہ کروانا زیادہ محفوظ ہے۔
