سائنس دانوں نے ایک ایسی دوا کے حوالے سے امید افزا نتائج سامنے لائے ہیں جو عمر بڑھنے کے ساتھ جسم میں جمع ہونے والے خراب اور ناکارہ خلیوں کو ختم کرنے میں مدد دیتی ہے۔ ابتدائی تحقیق کے مطابق یہ دوا عمر رسیدہ جلد کے زخموں کو تیزی سے بھرنے میں معاون ثابت ہوسکتی ہے۔
ایجنگ (ایجنگ-یو ایس) میں شائع ہونے والی تحقیق میں ABT-263 نامی دوا کے اثرات کا جائزہ لیا گیا۔ محققین نے عمر رسیدہ چوہوں کی جلد پر دوا براہِ راست لگائی اور بعد میں زخم بھرنے کے عمل کا مشاہدہ کیا۔
بوسٹن یونیورسٹی سے وابستہ محققین کے مطابق ABT-263 کے استعمال سے جلد میں عمر رسیدگی سے منسلک نقصان زدہ خلیوں کی تعداد کم ہوئی اور اس کے بعد زخم بھرنے کے عمل میں نمایاں بہتری دیکھی گئی۔
عمر کے ساتھ زخم دیر سے کیوں بھرتے ہیں؟
محققین کے مطابق عمر بڑھنے کے ساتھ جسم میں ایسے خلیے جمع ہونے لگتے ہیں جنہیں سینسنٹ سیلز کہا جاتا ہے۔ یہ خلیے عام طور پر تقسیم نہیں ہوتے اور ان کی موجودگی اردگرد کے ٹشوز کے معمول کے افعال اور زخم بھرنے کے عمل میں رکاوٹ بن سکتی ہے۔
تحقیق میں ABT-263 کے ذریعے ایسے خلیوں کی تعداد کم کرنے کے بعد عمر رسیدہ جلد کی زخموں سے بحالی بہتر دیکھی گئی۔
انسانوں کے لیے علاج کب ممکن ہوگا؟
محققین کا کہنا ہے کہ یہ نتائج مستقبل میں عمر رسیدہ افراد میں دیر سے بھرنے والے زخموں، خصوصاً سرجری یا بعض دائمی بیماریوں سے وابستہ زخموں کے علاج کے لیے نئی راہ ہموار کرسکتے ہیں۔
تاہم ماہرین نے واضح کیا ہے کہ یہ تجربات ابھی صرف چوہوں پر کیے گئے ہیں۔ انسانوں میں اس دوا کی حفاظت اور مؤثریت ثابت کرنے کے لیے مزید تحقیق اور کلینیکل مطالعات ضروری ہوں گے۔ اس لیے فی الحال اسے انسانوں میں زخم بھرنے کا ثابت شدہ علاج قرار نہیں دیا جاسکتا۔
