پاکستان ٹیلی ویژن (پی ٹی وی)کے بیٹر محمد شہزاد نے پریزیڈنٹ ٹرافی گریڈ ون کے تیسرے راؤنڈ میں شاندار بیٹنگ کرتے ہوئے پاکستانی فرسٹ کلاس کرکٹ میں تیز ترین سنچری کا نیا ریکارڈ قائم کردیا۔
اسلام آباد کے ڈائمنڈ کرکٹ گراؤنڈ میں کنگز مین اکیڈمی کے خلاف میچ میں شہزاد نے صرف 49 گیندوں پر اپنی سنچری مکمل کی۔
اس سے قبل یہ ریکارڈ سابق پاکستانی کپتان مصباح الحق کے پاس تھا جنہوں نے 2014 میں آسٹریلیا کے خلاف 56 گیندوں پر سنچری بنائی تھی۔
شہزاد کی اننگز میں 12 چوکے اور 8 چھکے شامل تھے۔ انہوں نے جارحانہ انداز اپناتے ہوئے مجموعی طور پر 62 گیندوں پر 114 رنز بنائے۔
یہ محمد شہزاد کی فرسٹ کلاس کرکٹ میں چھٹی سنچری ہے جبکہ 49 گیندوں پر بنائی گئی یہ سنچری عالمی فرسٹ کلاس کرکٹ کی تیز ترین سنچریوں میں آٹھویں نمبر پر بھی آتی ہے۔
