ٹام کروز کی نئی فلم ’ڈِگر‘ کے لندن پریمیئر نے اس وقت خاص توجہ حاصل کرلی جب شہزادہ ولیم اور شہزادی کیٹ بھی تقریب میں پہنچ گئے۔ فلم کی عالمی نمائش سے قبل ہونے والی اس تقریب نے لندن کے لیسٹر اسکوائر کو فلمی ستاروں کے ساتھ شاہی رنگ بھی دے دیا۔
شہزادہ ولیم اور شہزادی کیٹ نے وسطی لندن کے ODEON Luxe Leicester Square میں ہونے والے پریمیئر میں شرکت کی، جہاں انہوں نے فلم کی ٹیم اور دیگر مہمانوں کے ساتھ وقت گزارا۔ شہزادی کیٹ نے تقریب کے لیے جامنی رنگ کا خوبصورت گاؤن زیب تن کیا اور ہار بھی پہنا، جسے برطانوی میڈیا نے ملکہ مادر کے مشہور ایمیتھسٹ ہار سے منسوب کیا ہے۔
تقریب کے دوران ٹام کروز نے شہزادی کیٹ سے ملاقات کی اور بلیک کارپٹ پر ان سے گفتگو بھی کی۔ فلم کے ہدایت کار الیخاندرو گونزالیز انیاریتو سمیت دیگر اہم شخصیات بھی اس موقع پر موجود تھیں۔
پریمیئر میں سابق انگلش فٹبالر ڈیوڈ بیکھم بھی اپنے بیٹوں کے ہمراہ شریک ہوئے، جس سے تقریب کی اسٹار پاور مزید بڑھ گئی۔
’ڈگر‘ میں ٹام کروز ایک ایسے کردار میں نظر آئیں گے جسے انہوں نے خود تخلیق کیا ہے۔ فلم کی ہدایت کاری الیخاندرو گونزالیز انیاریتو نے کی ہے، جبکہ کروز کے مطابق یہ کردار کسی حقیقی شخصیت پر مبنی نہیں۔
فلم ’ڈگر‘ کو امریکا اور برطانیہ سمیت سینما گھروں میں 2 اکتوبر کو ریلیز کیا جائے گا۔
