برطانیہ میں امریکی فضائیہ کے زیرِ استعمال فیئرفورڈ ایئربیس کے قریب پولیس نے پانچ افراد کو گرفتار کرلیا ہے۔
برطانوی حکام کے مطابق گرفتار افراد کو دھماکا خیز مواد سے متعلق جرائم اور مبینہ طور پر دہشت گرد کارروائی کی تیاری کے شبہے میں حراست میں لیا گیا۔ واقعے کے بعد علاقے میں بڑا سیکیورٹی آپریشن شروع کیا گیا۔
برطانوی وزیر دفاع کے مطابق واقعہ میں فی الحال ایران کے ملوث ہونے کی بات کرنا درست نہیں ہے۔
برطانوی انسدادِ دہشت گردی پولیس کے مطابق اتوار کی رات تقریباً 12 بج کر 45 منٹ پر پولیس کو اطلاع ملی کہ تین مشکوک گاڑیاں ایئربیس کی جانب بڑھ رہی ہیں۔ مسلح پولیس اہلکاروں نے کارروائی کرتے ہوئے پانچ افراد کو گرفتار کرلیا، جبکہ فوج کی بم ڈسپوزل ٹیم نے تین وینز کا معائنہ شروع کردیا۔
حفاظتی اقدام کے طور پر قریبی علاقے کے تقریباً 85 گھروں کے رہائشیوں کو اپنے گھروں سے نکلنے کی ہدایت کی گئی اور انہیں قریبی تفریحی مرکز منتقل کیا گیا۔ مشتبہ گاڑیوں کے گرد تقریباً 400 میٹر کا حفاظتی حصار قائم کیا گیا، جبکہ علاقے میں مسلح پولیس اہلکار بھی تعینات رہے۔
پولیس کا کہنا ہے کہ واقعہ فی الحال قابو میں ہے اور پانچوں گرفتار افراد زیرِحراست ہیں، تاہم تحقیقات ابھی ابتدائی مرحلے میں ہیں۔ حکام نے گرفتار افراد کی شناخت، قومیت یا مبینہ منصوبے کے مقصد کے بارے میں حتمی معلومات جاری نہیں کیں۔
