بڈاپسٹ: ہنگری کی پارلیمنٹ نے وزیراعظم پیٹر میگیار سمیت تین قانون سازوں کا پارلیمانی استثنیٰ ختم کردیا ہے، جس کے بعد وزیراعظم کے خلاف مبینہ طور پر موبائل فون چھیننے اور اسے دریائے ڈینیوب میں پھینکنے کے معاملے کی تحقیقات آگے بڑھانے کا راستہ کھل گیا ہے۔ پارلیمنٹ میں قرارداد 139 ووٹوں سے منظور ہوئی، جبکہ مخالفت میں کوئی ووٹ نہیں آیا۔
یہ معاملہ جون 2024 کا ہے، جب میگیار اس وقت یورپی پارلیمنٹ کے رکن تھے۔ استغاثہ کے مطابق بڈاپسٹ کے ایک نائٹ کلب میں ایک شخص ان کی ویڈیو بنا رہا تھا، جس پر دونوں کے درمیان تلخ کلامی ہوئی۔ الزام ہے کہ میگیار نے اس شخص کا موبائل فون لے لیا اور بعد میں اسے دریائے ڈینیوب میں پھینک دیا۔ فون بعد میں غوطہ خوروں کی مدد سے دریا سے نکال لیا گیا۔
ہنگری کے پراسیکیوٹرز نے 2024 میں یورپی پارلیمنٹ سے میگیار کا استثنیٰ ختم کرنے کی درخواست کی تھی، تاہم یہ درخواست منظور نہیں ہوئی تھی۔ مئی 2026 میں ان کی یورپی پارلیمنٹ کی رکنیت ختم ہونے اور ہنگری کی پارلیمنٹ کا رکن بننے کے بعد انہیں دوبارہ پارلیمانی استثنیٰ حاصل ہوگیا، جس کے بعد پراسیکیوٹرز نے مقامی پارلیمنٹ سے استثنیٰ ختم کرنے کی درخواست کی۔
پیٹر میگیار نے خود بھی اپنا استثنیٰ ختم کرنے کی حمایت کی۔ ان کا کہنا ہے کہ انہوں نے کوئی جرم نہیں کیا اور وہ اس معاملے کو عدالت کے سامنے واضح کرنا چاہتے ہیں۔ ان کی جانب سے اس کیس کو سیاسی نوعیت کا بھی قرار دیا گیا ہے، جبکہ استغاثہ کا مؤقف ہے کہ استثنیٰ ختم ہونے کے بعد تحقیقات قانونی طور پر آگے بڑھائی جاسکتی ہیں۔
پارلیمنٹ نے وزیراعظم کے علاوہ سابق وزیر ثقافت و اختراع بالاز ہانکو اور سابق وزیر قومی ترقی میکلوس سیزتاک کا استثنیٰ بھی ختم کیا۔ دونوں سابق وزرا کو الگ الگ بدعنوانی سے متعلق تحقیقات کا سامنا ہے؛ ہانکو پر قومی ثقافتی فنڈ کے مبینہ غلط استعمال جبکہ سیزتاک پر مبینہ رشوت سے متعلق تحقیقات جاری ہیں۔
یہ فیصلہ ہنگری میں نئی حکومت کی جانب سے سابق حکومت کے دور سے متعلق مبینہ بدعنوانی کے معاملات کی تحقیقات کے پس منظر میں سامنے آیا ہے۔ تاہم تینوں معاملات میں پارلیمانی استثنیٰ ختم ہونا تحقیقات کا راستہ کھولتا ہے، جرم ثابت ہونے کا مطلب نہیں۔
