اسپیس ایکس کی اسٹار شپ ٹیسٹ فلائٹ کے دوران لائیو نشریات دیکھنے والے ناظرین کی توجہ اس وقت ایک غیر معمولی منظر نے حاصل کرلی جب سیاہ خلا میں خلائی گاڑی کے پیچھے ایک عجیب و غریب چمکتی ہوئی شے دکھائی دی۔
ٹیسٹ فلائٹ کے تقریباً 7 منٹ 55 سیکنڈ بعد براہ راست نشریات میں ہلکے نیلے رنگ کی ایک خمیدہ لکیر نظر آئی، جس کے ایک سرے پر روشن سفید نوک بھی دکھائی دے رہی تھی۔ منظر سامنے آنے کے چند ہی دیر بعد اس کے اسکرین شاٹس ایکس سمیت مختلف سوشل میڈیا پلیٹ فارمز پر گردش کرنے لگے۔
اس پراسرار منظر نے سوشل میڈیا صارفین کو مختلف قیاس آرائیوں کا موقع فراہم کیا۔ کچھ افراد نے اسے ’شہر سے بھی بڑی‘ اجنبی مدرشپ سے تشبیہ دی، جبکہ بعض نے سوال اٹھایا کہ کہیں یہ بین الاقوامی خلائی اسٹیشن تو نہیں۔
تاہم خلائی شائقین اور ماہرین نے منظر کی سائنسی وضاحت پیش کرنے میں زیادہ دیر نہیں لگائی۔ مبصرین کے مطابق نظر آنے والی چمک غالباً وہ گیس تھی جو سپر ہیوی بوسٹر کے انجن بند ہونے اور اسٹیج علیحدگی کے عمل کے دوران خارج ہوئی۔
ماہرین کے مطابق خلا میں خارج ہونے والی گیس تیزی سے پھیلتی ہے اور سورج کی روشنی اس کے بخارات سے منعکس ہوتی ہے۔ اسی عمل نے کیمرے میں ایک غیر معمولی اور کسی حد تک پراسرار کائناتی ساخت جیسا منظر پیدا کیا، جسے سوشل میڈیا پر ’یو ایف او‘ سے جوڑ دیا گیا۔
