امریکا نے سعودی عرب اور قطر میں مزید دو پیٹریاٹ میزائل دفاعی بیٹریاں تعینات کردی ہیں۔
یہ اقدام ایسے وقت میں سامنے آیا ہے جب ایران کے خلاف ممکنہ نئی امریکی فوجی کارروائی کے خدشات کے باعث خطے میں فوجی تیاریاں بڑھ رہی ہیں۔
امریکی خبر رساں ادارے ایکسیوس نے دو امریکی حکام اور ایک علاقائی ذریعے کے حوالے سے بتایا ہے کہ نئی تعیناتیوں کا مقصد دونوں خلیجی ممالک کی اہم توانائی تنصیبات کو ممکنہ حملوں سے تحفظ فراہم کرنا ہے۔
رپورٹ کے مطابق ایک پیٹریاٹ بیٹری گزشتہ ماہ سعودی عرب بھیجی گئی، جہاں اسے ایک اہم تیل تنصیب کے دفاع کے لیے تعینات کیا گیا ہے، جبکہ دوسری بیٹری قطر پہنچائی گئی ہے تاکہ قدرتی گیس کی ایک اہم تنصیب کی حفاظت کی جا سکے۔
ایکسیوس کے مطابق امریکی اقدام کا ایک مقصد سعودی عرب اور قطر کو یہ یقین دہانی کرانا بھی ہے کہ اگر ایران کے خلاف بڑے پیمانے پر فوجی کارروائیاں دوبارہ شروع ہوتی ہیں تو واشنگٹن ان کے اہم تیل اور گیس کے بنیادی ڈھانچے کے تحفظ میں مدد کرے گا۔
سعودی اور قطری قیادت نے اس سے قبل ایران کے خلاف ایسی کارروائیوں پر تشویش ظاہر کی تھی جن کے نتیجے میں ان کی اپنی توانائی تنصیبات بھی جوابی حملوں کا نشانہ بن سکتی ہیں۔
یہ پیش رفت خطے میں امریکی فوجی موجودگی میں اضافے کے ساتھ سامنے آئی ہے۔ حالیہ رپورٹس کے مطابق امریکا مزید بحری اور فوجی وسائل مشرق وسطیٰ کی جانب منتقل کر رہا ہے، جبکہ ایران کے ساتھ کشیدگی کے دوران خلیجی ممالک میں تیل اور گیس کی تنصیبات کے تحفظ پر بھی خصوصی توجہ دی جا رہی ہے۔
