اقوام متحدہ کے سیکریٹری جنرل انتونیو گوتریس نے سعودی عرب کے دارالحکومت ریاض میں شاہ خالد انٹرنیشنل ایئرپورٹ پر حوثیوں کے حملے کی شدید مذمت کرتے ہوئے اسے شہریوں اور شہری تنصیبات کے لیے مہلک حملہ قرار دیا ہے۔
سماجی رابطے کی ویب سائٹ ایکس پر اپنے بیان میں انتونیو گوتریس نے کہا کہ وہ ہفتے کے روز ریاض ایئرپورٹ پر ہونے والے حوثی حملے پر گہرے صدمے میں ہیں اور اس کی سخت الفاظ میں مذمت کرتے ہیں۔
اقوام متحدہ کے سربراہ کے مطابق حملے میں اطلاعات کے مطابق 12 افراد ہلاک اور سیکڑوں شہری زخمی ہوئے۔ انہوں نے کہا کہ شہریوں اور شہری تنصیبات کو نشانہ بنانا بین الاقوامی قانون کی خلاف ورزی ہے، ایسے حملے فوری طور پر بند ہونے چاہییں۔
انتونیو گوتریس کا بیان ایسے وقت میں سامنے آیا ہے جب ریاض ایئرپورٹ پر حملے کے بعد سعودی عرب کی حمایت میں مختلف ممالک کی جانب سے مذمتی بیانات جاری کیے جارہے ہیں۔
شہریوں اور اہم تنصیبات پر حملوں کے حوالے سے اقوام متحدہ کے سیکریٹری جنرل نے فوری طور پر حملے روکنے پر زور دیا ہے۔
