پشاور:
خیبرپختونخوا کے مختلف شہروں میں کل اسکول بند رہیں گے، ضلعی سطح پر مختلف نوٹی فکیشنز جاری ہوگئے۔
ایکسپریس نیوز کے مطابق خیبر پختونخوا میں ایمرجنسی نفاذ ہونے کے بعد صوابی ضلع میں کل 12 اکتوبر کو تمام تعلیمی ادارے بند رکھنے کا حکم دیا گیا ہے۔
ڈسٹرکٹ ایجوکیشن آفیسر صوابی اور ڈپٹی کمشنر کے مطابق موجودہ حالات کے تناظر میں بروز پیر تمام سرکاری اور پرائیویٹ تعلیمی ادارے بند رہیں گے۔
اسی طرح ضلع مردان میں کل 12 اکتوبر کو تمام سرکاری و نجی تعلیمی ادارے بند رکھنے کا اعلان کردیا گیا۔ ڈپٹی کمشنر مردان کے احکامات کے تحت ضلع مردان میں واقع تمام سرکاری و نجی تعلیمی ادارے، بشمول اسکولوں، کالجوں اور جامعات، بروز پیر، 12 اکتوبر 2026 کو بند رہیں گے، مذکورہ تاریخ کو منعقد ہونے والے تمام امتحانات اور پرچے بھی منسوخ قرار دیے گئے ہیں۔ تمام متعلقہ محکموں کے حکام اور تعلیمی اداروں کے سربراہان کو ہدایت کی گئی ہے کہ جاری کردہ احکامات پر سختی سے عملدرآمد یقینی بنائیں۔
ضلع نوشہرہ میں کل تمام سرکاری و نجی تعلیمی ادارے بند رکھنے کا اعلان کردیا گیا، ڈپٹی کمشنر نوشہرہ گوہر زمان کے مطابق ضلع نوشہرہ میں تمام سرکاری و نجی تعلیمی ادارے، بشمول اسکول و کالجز بشمول اور جامعات بروز پیربند رہیں گے، مذکورہ تاریخ کو منعقد ہونے والے تمام امتحانات اور پرچے بھی منسوخ قرار دیے گئے ہیں۔
تمام متعلقہ محکموں کے حکام اور تعلیمی اداروں کے سربراہان کو ہدایت کی گئی ہے کہ جاری کردہ احکامات پر سختی سے عمل درآمد یقینی بنائیں۔
بورڈ آف انٹرمیڈیٹ اینڈ سیکنڈری ایجوکیشن کوہاٹ کے زیرِ اہتمام ہونے والے امتحانات کو تاحکمِ ثانی ملتوی کر دیا گیا۔ امتحانات کے نئے شیڈول اور آئندہ لائحہ عمل سے متعلق طلبہ و طالبات، والدین اور متعلقہ تعلیمی اداروں کو بعد میں مطلع کیا جائے گا۔ تمام طلبہ و طالبات اور متعلقہ اداروں سے کہا گیا ہے کہ کسی بھی نئی اطلاع اور نظرثانی شدہ امتحانی شیڈول کا کوہاٹ بورڈ کی جانب سے سرکاری طور پر اعلان کیا جائے گا۔
