بھارتی کرکٹ بورڈ نے نیوزی لینڈ کے خلاف دو ٹیسٹ میچوں کی سیریز کے لیے جسپریت بمراہ اور رشبھ پانت کو اسکواڈ میں شامل کرلیا ہے تاہم پانت کی شرکت فٹنس کلیئرنس سے مشروط ہوگی۔
بھارت اور نیوزی لینڈ کے درمیان سیریز کا پہلا ٹیسٹ 19 نومبر کو ویلنگٹن میں کھیلا جائے گا۔
جسپریت بمراہ ون ڈے اسکواڈ کا حصہ نہیں ہوں گے تاہم ٹیسٹ سیریز میں بھارتی بولنگ اٹیک کی قیادت کریں گے۔ وہ نومبر 2025 کے بعد سے کوئی ٹیسٹ میچ نہیں کھیلے۔
ٹیم انتظامیہ ان کے ورک لوڈ کو مدنظر رکھتے ہوئے انہیں آئندہ اہم مقابلوں خصوصاً بارڈر گواسکر ٹرافی اور 2027 کے ون ڈے ورلڈ کپ کے لیے فٹ رکھنا چاہتی ہے۔
دوسری جانب رشبھ پانت ایرانی کپ کے دوران سائیڈ اسٹرین کا شکار ہوئے تھے جس کے باعث وہ نیوزی لینڈ اے کے خلاف ابتدائی دو غیر سرکاری ٹیسٹ میچز سے باہر ہوگئے۔
توقع ہے کہ وہ 7 سے 10 نومبر تک لنکن میں تیسرے غیر سرکاری ٹیسٹ میں حصہ لیں گے۔
بھارتی ٹیسٹ اسکواڈ میں آکاش دیپ اور انشول کمبوج کی بھی واپسی ہوئی ہے جبکہ رویندرا جڈیجا، واشنگٹن سندر اور کلدیپ یادیو اسپن بولنگ کے شعبے کو مضبوط بنائیں گے۔
شبمن گل ٹیم کی قیادت کریں گے جبکہ فٹنس مسائل کے باعث بعض کھلاڑیوں کی دستیابی حتمی طبی جانچ سے مشروط رہے گی۔
https://x.com/BCCI/status/2111114739460051062?s=20
