واشنگٹن: امریکی نائب صدر جے ڈی وینس نے اسرائیلی وزیراعظم بن یامین نیتن یاہو کی انتخابی حمایت کرنے سے گریز کرتے ہوئے کہا ہے کہ وہ اسرائیل کے انتخابات میں کسی فریق کی حمایت نہیں کریں گے۔ ان کا یہ بیان امریکی صدر ڈونلڈ ٹرمپ کی جانب سے نیتن یاہو کی کھل کر حمایت کے بعد سامنے آیا ہے۔
خبر رساں ادارے اے ایف پی کے مطابق جے ڈی وینس نے پیر کو صحافی مارک ہالپرین کو انٹرویو دیتے ہوئے کہا کہ وہ نہ نیتن یاہو کی مخالفت میں ہیں اور نہ ان کی حمایت کر رہے ہیں، بلکہ اسرائیلی انتخابات میں مداخلت نہیں کرنا چاہتے۔
وینس کا کہنا تھا کہ وہ صرف امریکی امیدواروں کی حمایت کرتے ہیں اور ان کی توجہ امریکا میں ہونے والے وسط مدتی انتخابات پر مرکوز ہے۔
اس سے قبل اتوار کو صدر ڈونلڈ ٹرمپ نے اپنے اتحادی نیتن یاہو کی حمایت کا اعلان کیا تھا۔ نیتن یاہو 27 اکتوبر کو ہونے والے اسرائیلی پارلیمانی انتخابات میں ایک بار پھر وزارتِ عظمیٰ کے امیدوار ہیں۔
رپورٹ کے مطابق اسرائیلی انتخابات سے دور رہنے کا وینس کا فیصلہ یورپی سیاست میں ان کے سابقہ کردار سے مختلف ہے۔ اپریل میں ہنگری کے پارلیمانی انتخابات سے چند روز قبل وہ اس وقت کے وزیراعظم وکٹر اوربان کی حمایت کے لیے بڈاپسٹ گئے تھے۔ وہ جرمنی کی انتہائی دائیں بازو کی جماعت اے ایف ڈی کی حمایت کا اظہار بھی کر چکے ہیں۔
وینس کے بارے میں یہ بھی کہا جاتا ہے کہ وہ 2029 میں ٹرمپ کے بعد امریکی صدارت کے امیدوار بننے کی خواہش رکھتے ہیں، تاہم یہ ان کے سیاسی مستقبل کے حوالے سے ایک تاثر ہے، کوئی باضابطہ اعلان نہیں۔
رپورٹ کے مطابق وینس نے ابتدا میں ایران کے خلاف امریکی اور اسرائیلی جنگ شروع کرنے کی مخالفت کی تھی، لیکن بعد میں اس فوجی مہم کا دفاع کیا۔ جون میں امریکا اور ایران کے درمیان مختصر مدت کی جنگ بندی پر تنقید کرنے والے اسرائیلی حکام کو بھی انہوں نے سخت جواب دیا تھا۔
وینس نے اس وقت کہا تھا کہ صدر ٹرمپ دنیا کے واحد سربراہِ مملکت ہیں جو موجودہ حالات میں اسرائیل کے ساتھ ہمدردی رکھتے ہیں۔ انہوں نے اسرائیلی حکومت کو خبردار کیا تھا کہ اسے اپنے طاقتور اتحادی امریکا پر تنقید کرتے ہوئے احتیاط برتنی چاہیے۔
