ہالی ووڈ اداکارہ جینا اورٹیگا نے بتایا ہے کہ وہ اپنی فلمیں دیکھنے اور ان کے بارے میں لوگوں کے تبصرے پڑھنے سے عموماً گریز کرتی ہیں، کیونکہ وہ نہیں چاہتیں کہ دوسروں کی رائے ان کے اپنے کام اور شخصیت کے بارے میں سوچنے کے انداز کو متاثر کرے۔
ایک غیر ملکی جریدے کو انٹرویو دیتے ہوئے اداکارہ نے کہا کہ اپنی فلمیں دیکھنا یا ان پر ہونے والے تبصرے پڑھنا انہیں ذہنی الجھن میں مبتلا کر سکتا ہے۔ اسی وجہ سے وہ اپنی ٹیم کی جانب سے بھیجے جانے والے باکس آفس کے اعداد و شمار دیکھنے سے بھی بچتی ہیں۔
جینا اورٹیگا کے مطابق وہ اپنے کام کی کامیابی کو صرف اس بنیاد پر نہیں پرکھنا چاہتیں کہ کسی فلم نے کتنی آمدنی حاصل کی۔ وہ کبھی کبھار دوستوں یا انسٹاگرام کے ذریعے لوگوں کی رائے سے آگاہ ہو جاتی ہیں، لیکن اب سوشل میڈیا پر پہلے کی نسبت کم وقت گزارتی ہیں۔
اداکارہ کا کہنا ہے کہ لوگ پہلے ہی انٹرنیٹ پر خود کو دیکھنے اور اپنی شخصیت کے بارے میں سوچنے میں بہت زیادہ وقت صرف کرتے ہیں۔ ان کے خیال میں مصنوعی ذہانت کے ذریعے بڑے پیمانے پر جعلی مواد تیار ہونے کے باعث یہ معاملہ مزید پیچیدہ ہو گیا ہے۔
جینا اورٹیگا ان دنوں ایمی ایڈمز کے ساتھ اپنی نئی فلم ’کلارا اینڈ دی سن‘ کی تشہیر کر رہی ہیں۔ فلم میں وہ کلارا نامی روبوٹ لڑکی کا کردار ادا کر رہی ہیں، جسے ایک خاندان اپنی بیٹی کا ساتھ دینے کے لیے خریدتا ہے۔
