برطانوی بحری ادارے یو کے ایم ٹی او نے تصدیق کی ہے کہ 4 نومبر کی رات ایک آئل ٹینکر کو دو نامعلوم گولہ نما اشیا سے نشانہ بنایا گیا۔
عالمی خبر رساں ادارے رائٹرز کے مطابق برطانوی بحری تجارتی آپریشنز ادارے نے بتایا کہ واقعہ بدھ 4 نومبر کی رات 11 بج کر 20 منٹ پر پیش آیا۔ ٹینکر کو قطر کے شہر مدینۃ الشمال سے تقریباً 50 بحری میل شمال میں نشانہ بنایا گیا۔
حملے میں استعمال ہونے والی اشیا کی نوعیت اور حملہ آوروں کی شناخت تاحال معلوم نہیں ہوسکی۔ جہاز کے عملے کی حالت، ٹینکر کو پہنچنے والے نقصان اور ممکنہ ماحولیاتی اثرات کے بارے میں بھی فوری طور پر معلومات سامنے نہیں آئیں۔
برطانوی بحری ادارے نے علاقے سے گزرنے والے دیگر جہازوں کو محتاط رہنے اور کسی بھی مشکوک سرگرمی کی اطلاع دینے کی ہدایت کی ہے۔
یہ واقعہ ایسے وقت میں پیش آیا ہے جب امریکا اور ایران کے درمیان جاری جنگ کے باعث خلیج اور آبنائے ہرمز میں بحری نقل و حرکت کو مسلسل خطرات لاحق ہیں۔
قطر بھی جنگ کے خاتمے کے لیے سفارتی کوششیں جاری رکھے ہوئے ہے جبکہ خطے میں تجارتی جہازوں کو نشانہ بنائے جانے کے واقعات نے بحری سلامتی کے خدشات مزید بڑھا دیے ہیں۔
