بھارت کے سابق فاسٹ بولر عرفان پٹھان نے بھی بال ٹیمپرنگ تنازعے پر عثمان خواجہ کی بات کی تصدیق کردی۔
جیو اسٹار سے گفتگو کرتے ہوئے عرفان پٹھان نے بال ٹیمپرنگ اور ریورس سوئنگ کے حوالے سے اہم موقف اختیار کرتے ہوئے کہا ہے کہ کسی گیند کے ساتھ چھیڑ چھاڑ کی جائے تو بولر اور پوری ٹیم کو اس کا اندازہ ہوجاتا ہے۔
عرفان پٹھان نے بتایا کہ راجکوٹ میں دلیپ ٹرافی کے ایک میچ کے دوران خشک پچ اور گھاس نہ ہونے کی وجہ سے آٹھویں یا دسویں اوور میں قدرتی طور پر ریورس سوئنگ شروع ہوگئی تھی۔
تاہم اگر 30 یا 40 اوورز کے بعد گیند کے ساتھ جان بوجھ کر چھیڑ چھاڑ کی جائے تو بولر اسے فوراً بھانپ سکتا ہے۔
انہوں نے 2018 کے آسٹریلوی بال ٹیمپرنگ اسکینڈل میں کیمرون بینکرافٹ کے ساتھ ہونے والی ناانصافی پر بھی افسوس کا اظہار کیا۔
ان کے مطابق بینکرافٹ نے 9 ماہ کی پابندی بھگتی اور واپسی کے بعد صرف دو ٹیسٹ میچ کھیل سکے جبکہ اسٹیو اسمتھ اور ڈیوڈ وارنر دوبارہ ٹیم میں جگہ بنانے میں کامیاب رہے۔
عرفان پٹھان نے کہا کہ آٹھ سال بعد اس معاملے پر دوبارہ بحث کے بجائے اگر آسٹریلوی عوام کو جواب درکار ہیں تو تحقیقات دوبارہ ہونی چاہئیں۔