امریکی صدر ڈونلڈ ٹرمپ چین کے اہم دورے سے قبل فلپائن کے دارالحکومت منیلا پہنچ گئے

امریکی صدر کی آمد سے قبل منیلا میں مسلسل پانچویں روز مظاہرے کیے گئے اور مظاہرین نے ٹرمپ کے پتلے بھی نذرِ آتش کیے


ویب ڈیسک November 17, 2026

منیلا: امریکی صدر ڈونلڈ ٹرمپ چین کے اہم دورے سے قبل فلپائن کے دارالحکومت منیلا پہنچ گئے ہیں، جہاں ان کی آمد کے موقع پر احتجاجی مظاہرے بھی جاری ہیں۔

ٹرمپ اپنے ایشیائی دورے کے دوران دو سال کے وقفے کے بعد امریکا، جاپان، آسٹریلیا اور بھارت پر مشتمل کواڈ گروپ کے سربراہی اجلاس میں شرکت کریں گے۔

خبر رساں ادارے کے مطابق ٹرمپ منگل کی سہ پہر جنوب مشرقی ایشیائی ممالک کی تنظیم (آسیان) کے سربراہی اجلاس کے اختتام پر منیلا پہنچے۔ وہ اسی روز امریکا اور آسیان کے درمیان خصوصی اجلاس میں بھی شریک ہوں گے۔

ٹرمپ کا یہ دورہ ایسے وقت میں ہورہا ہے جب امریکا میں وسط مدتی انتخابات میں ری پبلکن پارٹی کو شکست کا سامنا کرنا پڑا ہے، جبکہ چین پر جاسوسی کے الزامات اور مصنوعی ذہانت کے لیے جدید چپس تک اس کی رسائی محدود کرنے کے امریکی اقدامات نے دونوں ملکوں کے درمیان تجارتی تعلقات کو مزید پیچیدہ بنا دیا ہے۔

امریکی صدر کی آمد سے قبل منیلا میں مسلسل پانچویں روز مظاہرے کیے گئے۔ مظاہرین نے ٹرمپ کے پتلے بھی نذرِ آتش کیے اور مشرقِ وسطیٰ کی جنگ ختم کرنے کے مطالبات کیے۔

احتجاج کرنے والوں نے امریکا کی قیادت میں شروع کیے گئے ’پیکس سلیکا‘ سپلائی چین منصوبے کو ختم کرنے کا مطالبہ بھی کیا۔ یہ منصوبہ اہم ٹیکنالوجی اور سپلائی چین کے شعبوں میں تعاون سے متعلق ہے۔

ٹرمپ منگل کو کواڈ گروپ کے اجلاس میں شرکت کریں گے، جس میں امریکا، جاپان، آسٹریلیا اور بھارت شامل ہیں۔ یہ ٹرمپ کی بطور صدر اس گروپ کے رہنماؤں کے ساتھ پہلی ملاقات ہوگی، جبکہ کواڈ کا آخری سربراہی اجلاس دو سال قبل منعقد ہوا تھا۔

اجلاس میں سمندری سلامتی، اہم معدنیات کی فراہمی، برآمدات پر پابندیوں، مصنوعی ذہانت اور سپلائی چین کو متنوع بنانے جیسے معاملات زیرِ بحث آنے کا امکان ہے۔ زیرِ سمندر مواصلاتی کیبلز، نئی ٹیکنالوجی اور قدرتی آفات سے نمٹنے کے لیے تعاون بھی ممکنہ موضوعات میں شامل ہیں۔

کواڈ کے رکن ممالک کا کہنا ہے کہ یہ اتحاد کسی ایک ملک کے خلاف نہیں، تاہم چین اسے اپنے گرد گھیرا تنگ کرنے کی کوشش قرار دیتا رہا ہے۔

ٹرمپ منگل کو تھائی وزیراعظم انوتن چارنویراکول کے ساتھ باہمی تجارت سے متعلق ایک مشترکہ بیان پر دستخط کریں گے۔ اس میں دونوں ممالک کے درمیان تجارتی مذاکرات میں ہونے والی پیش رفت کا ذکر متوقع ہے۔

امریکا تھائی لینڈ کی برآمدات کی سب سے بڑی منڈی ہے، جہاں اس سال تھائی برآمدات کا 24 فیصد حصہ بھیجا گیا۔

ٹرمپ بدھ کو فلپائن کے صدر فرڈینینڈ مارکوس جونیئر سے ملاقات کریں گے۔ اس کے بعد وہ چین کے شہر شینزن روانہ ہوں گے، جہاں ایشیا پیسیفک اقتصادی تعاون (اے پیک) فورم منعقد ہوگا۔ اس دورے میں چینی صدر شی جن پنگ اور روسی صدر کے ساتھ مجوزہ سہ فریقی ملاقات بھی اہمیت رکھتی ہے۔