ڈکیتی و بھتہ خوری تاجروں کا برنس روڈ سے کاروبار منتقل کرنے کا فیصلہ

پولیس وارداتیں روکنے کے بجائے ناجائز تجاوزات کے بھتے اور کھانے پینے کا سامان جمع کرنے میں مصروف رہتی ہے،دکاندار فوٹو: فائل

---

KARACHI: برنس روڈ پر ڈکیتی اور بھتہ خوری کی وارداتوں میں تشویشناک حد تک اضافے کے باعث تاجروں نے کاروبار دیگر علاقوں میں منتقل کرنے کا فیصلہ کرلیا۔

گذشتہ10دن کے دوران برنس روڈ فوڈ اسٹریٹ کی 20سے زائد دکانوں سے مسلح ملزمان لاکھوں روپے لوٹ کر فرار ہو گئے، پولیس وارداتوں میں ملوث ایک بھی ملزم کو گرفتار نہیں کرسکی۔

چند روز قبل شہریوں نے ایک ڈاکو کو پکڑ کر پولیس کے حوالے کیا تھا، تفصیلات کے مطابق آرام باغ تھانے کی حدود شارع لیاقت المعروف برنس روڈ فوڈ اسٹریٹ پر واقع آغا سجی ہوٹل سے منگل کی شب تقریباً 9بجے2نامعلوم موٹر سائیکل سوار ملزمان کیش کاؤنٹر اور کھانا کھانے آنے والوں سے ہزاروں روپے نقدی، موبائل فون اور قیمتی سامان لوٹ کر فرار ہوگئے۔

عینی شاہدین نے بتایا کہ واردات کے وقت چند قدم کے فاصلے فریسکو چوک پر آرام باغ تھانے کی پولیس موبائل کھڑی تھی تاہم پولیس نے واردات کے بعد فرار ہونے والے ملزمان کو روکنے کیلیے کسی قسم کی کوشش نہیں کی۔

برنس روڈ کے ایک دکاندار محمد ندیم نے ایکسپریس کو بتایا کہ گذشتہ10دنوں کے دوران ملزمان20سے زائد دکانداروں سے لاکھوں روپے نقدی، موبائل فون اور دیگر قیمتی سامان لوٹ کر لے گئے تاہم پولیس نے وارداتوں کو روکنے کیلیے کسی قسم کی منصوبہ بندی نہیں کی، پولیس حسب معمول فوڈ اسٹریٹ پر ناجائز تجاوزات کے بھتے اور کھانے پینے کا سامان جمع کرنے میں مصروف رہتی ہے۔

مسلح ملزمان گذشتہ10دنوں کے دوران مبینہ طور پر گجرات ڈپارٹمنٹل اسٹور، ہیو مور آئسکریم پارلر، پنجاب لسی ہاؤس، حاجی ملک شاپ، بابا ربڑی، مٹکا آئسکریم سمیت دیگر چھوٹے بڑے ہوٹلز اور ملک شاپ، موبائل شاپ سے دن دیہاڑے لوٹ مار کرکے فرار ہو گئے۔

عینی شاہدین نے بتایا کہ ملزمان واردات کیلیے کسی بھی وقت آجاتے ہیں واردات کا کوئی مخصوص وقت نہیں ہے، صبح7بجے ملک شاپس کو لوٹا جاتا ہے جبکہ شام اور رات کی تاریکی پھیلتے ہی ملزمان ڈپارٹمنٹل اسٹور، ہوٹلز اور راہگیروں سے لوٹ مار کرتے ہیں۔