جامعہ اردو گلشن اقبال کیمپس کی لیب کی چھت کا پلاسٹرگرگیا

اس واقعے کے بعد وفاقی اردویونیورسٹی گلشن اقبال کیمپس کے اساتذہ نے معاملے پر احتجاج کیا اورتدریسی عمل کا بائیکاٹ کردیا۔ فوٹو: فیس بک

---

وفاقی ا ردو یونیورسٹی گلشن کیمپس کے شعبہ ریاضی کی ریسرچ لیب کی خستہ حال چھت کا پلاسٹرگرگیا۔

جس سے وہاں رکھے ہوئے فرنیچرودیگرسازو سامان کوشدید نقصان پہنچا جبکہ چھت میں لگا ہواسریا نظرآنے لگا،اس واقعے کے بعد وفاقی اردویونیورسٹی گلشن اقبال کیمپس کے اساتذہ نے معاملے پر احتجاج کیا اورتدریسی عمل کا بائیکاٹ کردیا۔

تدریسی عمل کا بائیکاٹ اردویونیورسٹی کی انجمن اساتذہ سائنس کیمپس کی جانب سے کیا گیا تھا جبکہ دوسری جانب انجمن اساتذہ نے آج جمعرات 27ستمبر کو اجلاس عام طلب کرلیا ہے۔

یہ اجلاس صبح11بجے عبدالقدیر خان آڈیٹو ریم میں طلب کیا ہے جس میں یونیورسٹی کی موجودہ صورتحال کو زیربحث لایا جائے گا ، دریں اثنا انجمن اساتذہ نے اپنے جاری بیان میں کہا ہے کہ جامعہ اردوکا مرکزی دروازہ ،سبزہ زاراور کھیلوں کے میدان بھی بدترین حالت کا شکار ہیں اورحیران کن بات یہ ہے کہ جامعہ اردو کے10ہزار طلبا کیلیے انتظامیہ کی جانب سے ٹرانسپورٹ کا کوئی انتظام نہیں ہے ۔

مستقل وائس چانسلر نہ ہونے کی وجہ سے جامعہ میں اساتذہ اور طلبا اپنے امور یکسوئی سے انجام نہیں دے پارہے ہیں لہٰذا تمام اساتذہ یونیورسٹی کے چانسلر صدرزرداری سے درخواست کرتے ہیں کہ فی الفورنئے مستقل وائس چانسلرکا تقرر کر دیا جائے۔