عید پر پاکستانی فلموں’’ آپریشن021‘‘ اور’’ نامعلوم افراد‘‘ نے بھارتی فلموں کو پچھاڑ دیا

پاکستانی فلموں نے بالی وڈاسٹارہریتک روشن اورکترینہ کیف کی کثیرسرمائے سے بننے والی فلم ’’بینگ بینگ‘‘ کا بینڈ بجادیا۔

Showbiz Reporter October 09, 2014

مہوش حیات کے گانے ’’بلی ‘‘ کی ہر طرف دھوم، عید کے موقع پر ہریتک روشن اور کترینہ کیف کی فلم ’’بینگ بینگ‘‘ نے زیادہ رش نہیں لیا فوٹو: فائل

لاہور: عید الاضحی کے موقع پرنمائش کے لیے پیش کی جانے والی پاکستانی فلموں نے بالی وڈاسٹارہریتک روشن اورکترینہ کیف کی کثیرسرمائے سے بننے والی فلم ''بینگ بینگ'' کا بینڈ بجادیا۔

ایک طرف فلم اسٹار شان، ایوب کھوسہ اورحمید شیخ نے اپنی جانداراداکاری سے فلم ''آپریشنO21 '' کی کامیابی میں اہم کردار اداکیا تودوسری جانب اداکارجاوید شیخ، فہد مصطفیٰ اورمحسن کی بہترین اداکاری اورمہوش حیات پرفلمائے گئے آئٹم سانگ نے ''نامعلوم افراد'' کولوگوں کی توجہ مرکزبنادیا۔ لاہور، کراچی ، اسلام آباد، راولپنڈی، گوجرانوالہ، سرگودھا، ملتان سمیت دیگرشہروں میں پاکستانی فلموں نے ریکارڈ بزنس کیا جب کہ ان کے مقابلے میں ہریتک روشن اورکترینہ کیف کی فلم ''بینگ بینگ''کا بزنس ایوریج رہا۔ واضح رہے کہ فلم کے ڈائریکٹر جامی ہیں جب کہ فلم کی پروڈیوسر زیبا بختیاراورمیوزک اذان سمیع نے ترتیب دیا ہے ۔

عید پرریلیزہونے والی دوسری فلم''نامعلوم افراد'' ہے جسے نوجوان ڈائریکٹر نبیل قریشی اورفضا علی مرزا نے بنایاہے۔ یہ ایک کمرشل فلم ہے اوراس میں ہمارے معاشرے کی ایک کہانی کوموضوع بنایا گیا ہے لیکن اس کے ساتھ ساتھ فلم میں مزاح اورمیوزک کا بھی خاص خیال رکھا گیا ہے۔ فلم میں مہوش حیات پرپکچرائزکیا گیا آئٹم سانگ''بلی''بہت پسند کیا جارہا ہے جب کہ ولن کے روپ میں سلمان شاہد کا کردار بھی شائقین کی توقعات کے مطابق ہے۔