پانی اور بجلی کی عدم فراہمی لانڈھی تین ہٹی اور دیگر علاقوں میں مظاہرے

کے الیکٹرک اور واٹر بورڈ نے شہریوں کا جینا حرام کیا ہوا ہے، شکایات درج کرنے کے باوجود شنوائی نہیں ہورہی، مظاہرین

Staff Reporter October 15, 2014

طویل غیر اعلانیہ لوڈ شیڈنگ اور پانی کی عدم فراہمی پر علاقہ مکین مشتعل ہو گئے اور نعرے لگاتے ہو ئے جلوس کی شکل میں تین ہٹی چوک پر جمع ہو گئے، (فوٹو ایکسپریس)

لانڈھی ، پی آئی بی کالونی، تین ہٹی ، نشتر روڈ اور ملحقہ علاقوں بجلی کی طویل غیر اعلانیہ لوڈ شیڈنگ اور پانی کی بندش کے خلاف مکینوں نے احتجاج کیا، تین ہٹی پر ٹینکر اور رکشے کھڑے کر کے ٹریفک معطل کرا دیا اور سڑک پر ٹائر جلائے ، مذاکرات کے لیے آنے والے پولیس افسران کو بھی بھگا دیا۔

تفصیلات کے مطابق پی آئی بی کالونی ، تین ہٹی ، نشتر روڈ ، لیاقت آباد اور متصل علاقوں میں بجلی کی طویل غیر اعلانیہ لوڈ شیڈنگ اور پانی کی عدم فراہمی پر علاقہ مکین مشتعل ہو گئے اور نعرے لگاتے ہو ئے جلوس کی شکل میں تین ہٹی چوک پر جمع ہو گئے ، واٹر ٹینکر اور رکشے کھڑے کر کے ٹریفک معطل کرا دیا ، ہنگامہ کے نتیجے میں لیاقت آباد ، پی آئی بی کالونی ، نشتر روڈ ، گرومندر نمائش چورنگی ، نیو ایم اے جناح روڈ ، پریڈی اسٹریٹ ، ایمپریس مارکیٹ ، ایم اے جناح روڈ سمیت دیگر اہم شاہراہوں پر بدترین ٹریفک جام ہوگیا، پولیس کی جانب سے مظاہرین کو منتشر کرنے کے لیے متعدد بار مذاکرات کیے گئے ۔

تاہم مظاہرین نے بات چیت کرنے سے انکار کر دیا تاہم کئی گھنٹوں کی سخت جدوجہد کے بعد پولیس مظاہرین کو منتشر کرنے میں کامیاب ہوگئی ، دریں اثنا لانڈھی کے علاقے فیوچر کالونی اور پی آئی بی کالونی میں بھی مشتعل افراد نے پانی اور بجلی کی عدم فراہمی پر شدید احتجاج کرتے ہوئے سڑک پر دھرنا دے کر ٹریفک معطل کر دیا، مشتعل افراد کا کہنا تھا کہ کے الیکٹرک اور واٹر بورڈ نے شہریوں کا جینا حرام کیا ہوا ہے نہ تو گھروں میں بجلی ہے اور نہ ہی پانی جبکہ متعلقہ اداروں کو کئی بار شکایات درج کرانے کے باوجود کوئی شنوائی نہیں ہو رہی ، ہنگامہ آرائی کے بعد لانڈھی فیوچر کالونی اور پی آئی بی کالونی مینا بازار کے قریب ٹریفک معطل ہوگیا، پولیس نے مظاہرین کو یقین دہانی کے بعد پرامن منتشر کر دیا۔