کسی نے سچ ہی کہا ہےکہ جسے اللہ رکھے اسے کون چکھے اور ایسا ہی کچھ ہوا امریکا میں جہاں ورلڈ ٹریڈ سینٹر کی 104 ویں منزل پر کھڑکیوں کی صفائی کے دوران ونڈو واشر کے ٹوٹ جانے سے کئی گھنٹوں تک پھنسے رہنے والے مزدوروں کو بچا لیاگیا۔
نیو یارک میں حال ہی میں کھولے جانے والی تاریخی عمارت ون ورلڈ ٹریڈ سینٹر کی 104 منزلہ عمارت کے باہر 2 مزدور شیشوں کی صفائی کے کام میں مصروف تھے کہ ان کی ونڈو واشر کی رسی ایک طرف سے ٹوٹ گئی اور ان کا پلیٹ فارم جھولتا ہوا نیچے کی طرف آنے لگا اور عمارت کی 69 ویں منزل پر آکر رک گیا، فوری طور پر ان کے پاس ریڈیو سیٹ سے ریسکیو ٹیم نے رابطہ کیا اور ان کو بچانے کے لیے کارروائی کا آغاز کردیا، سب سے پہلے عمارت کی چھت سے ایک رسی ان کی طرف پھینکی گئی تاکہ وہ اسے اپنی کمر سے باندھ لیں اور واشر کے گرنے کی صورت میں محفوظ رہیں، اس کے بعد ریسکیو ورکرز عمارت کے اندر سے اس جگہ پہنچ گئے یہاں یہ دونوں ٹوٹے ہوئے ڈش واشر میں جھول رہے تھے۔ ان کے پلیٹ فارم کے ساتھ موجود شیشے کی کھڑکی کو کاٹنے کا عمل شروع کیا گیا جو بہت صبرآزما ثابت ہوا۔
حکام کا کہنا تھا کہ یہ شیشہ تین لیئر پو مشتمل تھا اسے کاٹنے کے لیے ڈائمنڈ کا الیکٹرک آرا استعمال کیا گیا، کئی گھنٹے کی کوششوں کے بعد دونوں مزدوروں کو نکال کر اسپتال منتقل کردیا گیا جہاں انہں معمولی ذہنی تھراپی کے بعد فارغ کردیا گیا جب کہ دلچسپ بات یہ ہے کہ دونوں کو معمولی سی خراش بھی نہیں آئی۔
حکام کے مطابق صرف نیو یارک میں کھڑکیاں صاف کرنے والے 600 مزدور کام کرتے ہیں جب کہ ایک ایسا ہی ایک واقعہ 2013 میں بھی پیش آیا تھا جس میں مین ہٹن کے ہارٹ ٹاور کی 49 ویں منزل پرونڈو واشر کے ٹوٹ جانے سے دو مزدور پھنس گئے تھے تاہم 90 منٹ کی انتھک جدوجہد کے بعد انہیں بھی بچا لیا گیا تھا۔