سڑک پر رکھی رکاوٹوں سے ٹکرا کر موٹر سائیکل سوار ہلاک

شاہراہ فیصل پر گاڑی کی ٹکر سے موٹر سائیکل سوار جاں بحق ہوگیا، بجلی کا کرنٹ لگنے سے ایک شخص ہلاک، 2 زخمی۔ فوٹو: ایکسپریس/فائل

---

FAISALABAD: مختلف علاقوں میں ٹریفک حادثات میں 2 افراد ہلاک اور 10 سالہ بچہ سمیت 3 زخمی ہوگئے، قائد آباد میں بجلی کا کرنٹ لگنے سے ایک ہلاک اور 2 افراد جھلس کر زخمی ہوگئے۔

تفصیلات کے مطابق نیو پریڈی اسٹریٹ پارکنگ پلازہ کے قریب پولیس کی جانب سے سڑک کے درمیان میں رکھی کنکریٹ کی رکاوٹوں سے ٹکرا کر موٹر سائیکل سوار18 سالہ ارسلان ولد غلام محمد ہلاک ہوگیا، متوفی کی لاش جناح اسپتال لائی گئی جہاں سے موت کی تصدیق کے بعد ورثا لاش پولیس کارروائی کے بغیر لے گئے، متوفی لائنز ایریا کا رہائشی تھا، شاہراہ فیصل بلوچ کالونی پل کے قریب فائن ہاؤس کے سامنے گاڑی کی ٹکر سے موٹر سائیکل سوار 35 سالہ سردار ہلاک جبکہ 30 سالہ سراج ولد ساون زخمی ہوگئے، ہلاک و زخمی ہونے والوں کو جناح اسپتال پہنچایا گیا، متوفی بلوچ کالونی کا رہائشی تھا۔

سرجانی ٹاؤن کے علاقے سیکٹر5/D میں نامعلوم گاڑی کی ٹکر سے10 سالہ فصیح الدین ولد اعجاز الدین زخمی ہوگیا،لانڈھی داؤد چورنگی کے قریب نامعلوم گاڑی کی ٹکر سے 32 سالہ گل زمان ولد اطہر گل زخمی ہوگیا، نیشنل ہائی وے ایبٹ فارما سوٹیکل کمپنی کے عقب میں واقع ماروی گوٹھ میں گھر میں کام کے دوران کرنٹ لگنے سے 35 سالہ عبد الغفور ولد غلام حسین ہلاک جبکہ 25 سالہ رسول ولد اسلم اور 25 چیتا جھلس کر زخمی ہوگئے، پولیس کے مطابق متوفی عبد الغفور اور زخمیوں کے اہل خانہ نے واقعے کو اتفاقیہ حادثہ قرار دیتے ہوئے پولیس کارروائی کرانے سے انکار کردیا۔