پی آئی اے کا مالی بحران سنگین ہوگیا ملازمین کو تنخواہوں کی ادائیگی میں مشکلات

پی آئی اے میں 5 سے گروپ 10 تک کے ملازمین کی تعداد 7ہزار ہے فوٹو: فائل

---

پاکستان انٹرنیشنل ایئرلائن انتظامیہ نے کراچی کے ملازمین کوبھی دسمبرکی تنخواہوں کے نصف چیک جاری کر دیے جبکہ باقی نصف تنخواہ 18جنوری کو جاری کی جائے گی۔

پی آئی اے کے انتظامی افسرکے مطابق مذکورہ افسرکے مطابق پی آئی اے انتظامیہ شدید مالی بحران کا شکارہے۔ پی آئی اے میں 5 سے گروپ 10 تک کے ملازمین کی تعداد 7ہزار ہے۔ جنہیں 9جنوری کوآدھی تنخواہ کے چیک جاری کئے گئے تھے جبکہ باقی نصف تنخواہ 18جنوری کو جاری کی جائے گی۔

پی آئی اے میں ساساایسوسی ایشن کے رہنماؤں نے بتایاکہ قومی ادارے کی تباہی کے ذمے داروں اور نصف تنخواہ نا منظور کے حوالے سے پیرکواحتجاج بھی کیاگیا اور ملازمین میں ہینڈبل بھی تقسیم کیے گئے جس میں آدھی تنخواہ نہ لینے کے حوالے سے ملازمین کوآگاہ کردیا گیا ہے۔ ان رہنماؤں نے بتایا کہ ایک طرف پی آئی اے میں لاکھوں روپے ماہانہ تنخواہوں پر منظورنظر افراد کو تعینات کیاجارہا ہے جبکہ دوسری جانب ادارے کے ملازمین کووقت پر تنخواہوں کی ادائیگیاں بھی نہیں کی جارہی جوملازمین کے ساتھ ظلم ہے۔