دہشت گردوں نے عرب ملکوں کی سلامتی کو خطرے میں ڈال دیا روسی صدر

ولادی میر پوتن نے دہشت گرد واقعات پر افسوس کا اظہار کرتے ہوئے کہا کہ روس مجرمانہ اور وحشیانہ کارروائیوں کی بھر پور مذمت کرتا ہے۔ فوٹو: فائل

---

ISLAMABAD: روس کے صدر ولادی میر پوتن نے کہا ہے کہ شدت پسندوں اور دہشت گردوں نے کئی عرب ملکوں کی سلامتی کو خطرے سے دوچار کر دیا ہے، دہشت گرد کارروائیوں سے لاکھوں افراد متاثر ہو رہے ہیں اور شدت پسندوں نے انسانی تاریخ کے بیش قیمت ثقافتی ورثے کو تباہ و برباد کر دیا۔

اتوار کو صدارتی ویب سائٹ پر جاری ایک بیان میں صدر ولادی میر پوتن نے شرم الشیخ میں عرب لیگ سربراہ اجلاس کا خیر مقدم کیا ہے، صدر پوتن نے کہا کہ ہمارا خیال ہے کہ علاقائی صورت حال میں بہتری کے بغیر دہشت گردی کے خلاف موثر جنگ ممکن نہیں، اس مقصد کے لیے بین الاقوامی قوانین کے اصولوں کی بنیاد پر شام، لیبیا اور یمن کے بحرانوں کو جلد از جلد مذاکرات کے ذریعے حل کرنے کی ضرورت ہے، انھوں نے دہشت گرد واقعات پر افسوس کا اظہار کرتے ہوئے کہا کہ روس ان مجرمانہ اور وحشیانہ کارروائیوں کی بھر پور مذمت کرتا ہے۔