آسٹریلیا نے لائیو اسٹاک ایکسپورٹ پر پابندی نہیں لگائی پاکستانی قونصل جنرل

بھیڑوں کو بیمار قرار دے کر تلف کیے جانے پر آسٹریلیا اور پاکستان کے معاشی تعلقات پر کوئی اثر نہیں پڑا، اعظم محمد فوٹو: فائل

---

سڈنی میں تعینات پاکستانی قونصل جنرل اعظم محمد نے کہا ہے کہ آسٹریلوی بھیڑوں کو بیمار قرار دے کر تلف کیے جانے پر آسٹریلیا اور پاکستان کے معاشی تعلقات پر کوئی اثر نہیں پڑا۔

آسٹریلیا نے پاکستان کو لائیو اسٹاک کی ایکسپورٹ پر پابندی عائد نہیں کی۔ ایکسپو پاکستان میں شرکت کیلیے آسٹریلوی وفد کے ہمراہ پاکستان کے دورے پر آئے ہوئے پاکستانی قونصل جنرل نے ''ایکسپریس'' کو بتایا کہ آسٹریلیا پاکستان کے ساتھ معاشی روابط کو مستحکم کرنا چاہتا ہے، آسٹریلیا کا 5رکنی وفد ایکسپو پاکستان میں شریک ہے جس نے پاکستانی گارمنٹ، بیڈ لینن، فوڈ اور مصالحہ جات کی خریداری میں دلچسپی ظاہرکی ہے۔

انہوں نے بتایا کہ بھیڑوں کے معاملے پر آسٹریلیا میں تشویش پائی جاتی ہے تاہم پاکستان پر کوئی پابندی عائد نہیں کی گئی، پاکستانی سفارتخانے نے اس معاملے پر اپنی پوزیشن سے آگاہ کرتے ہوئے آسٹریلوی حکام کو بتایا ہے کہ بھیڑوں کو بے دردی سے تلف نہیں کیا گیا بلکہ عین اسلامی طریقے سے ذبح کرکے دفنایا گیا ہے۔