پاک بھارت بورڈز میں مذاکرات کا ایک اور راؤنڈ ہوگا

نشریاتی ادارے کے حوالے سے گیند پی سی بی کے کورٹ میں ہے، بی سی سی آئی فوٹو: فائل

---

سیریز کے حوالے سے پاک بھارت بورڈز میں مذاکرات کا ایک اور راؤنڈ ہوگا، میزبان ملک اور میچز کی تعداد کو حتمی شکل دی جائے گی، بی سی سی آئی کے سیکریٹری انوراگ ٹھاکر کہتے ہیں کہ نشریاتی ادارے کے حوالے سے گیند پی سی بی کے کورٹ میں ہے، یہ سیریز ہماری نہیں اسی کی ہے۔

تفصیلات کے مطابق پاکستان اور بھارت کے درمیان کرکٹ تعلقات کی بحالی پر اتفاق کے باوجود کئی امور اب بھی حل طلب ہیں، جس کے لیے دونوں بورڈز میں مذاکرات کا ایک دور اور ہوگا۔ پریس کانفرنس سے خطاب کرتے ہوئے بی سی سی آئی کے سیکریٹری انوراگ ٹھاکر نے کہا کہ ممکنہ طور پر آنے والے چند دنوں یا ہفتوں میں دونوں بورڈز کے درمیان بات چیت کا دوسرا دور ہوگا۔ ابھی سیریز کا فیصلہ نہیں ہوا مگر معاملہ پارلیمنٹ میں بھی جا پہنچا اور بعض چینلز پر بحث کا باعث بھی بنا ہوا ہے، میں صرف یہ کہنا چاہتا ہوں کہ جو بات چیت دونوں بورڈز کے درمیان ہورہی ہے وہ ابھی ابتدائی مرحلے پر ہے۔

حکومت کی سطح پر اس بارے میں کیا سوچا جارہا ہے اور وہ کیا فیصلہ کرتے ہیں اس بارے میں ابھی کوئی بات نہیں ہوئی۔ انوراگ نے مزید کہا کہ پاکستان اور بھارتی بورڈ کے درمیان بہت سے معاملات پر ابھی تبادلہ خیال ہونا باقی ہے، پی سی بی کے چیئرمین شہریار خان نے ڈالمیا اور مجھ سے ملاقات میں ہمیں اپنے نقطہ نظر سے آگاہ کیا،انہوں نے کہا کہ پاکستان میں صورتحال بہتر نہیں، اس لیے اگر سیریز ہوئی تو پھر اس کا میزبان کون ہوگا اس بارے میں فیصلہ کرنا ہے، جب ان سے پاکستان بورڈ کے نشریاتی پارٹنر کے حوالے سے سوال ہوا تو ٹھاکر نے کہا کہ ایسل گروپ کے خلاف کئی مقدمات چل رہے ہیں، میں اس پر بات کرنا پسند نہیں کرتا، گیند پی سی بی کے کورٹ میں ہے اور اسی کو اس بارے میں فیصلہ کرناہے۔ اس موقع پر انھوں نے واضح کیاکہ اس بار میزبانی کی باری پاکستان کی ہے۔