ایس بی سی اے کی کرپشن سے آصف زرداری کو بھی حصہ جاتا تھا ذوالفقار مرزا

مفاہمت کے نام پر اربوں روپے کھالیے گئے، تقرر اور تبادلے بلاول ہاؤس سے ہوتے ہیں۔ فوٹو: فائل

---

سندھ کے سابق وزیر داخلہ ڈاکٹر ذوالفقار مرزا کا کہنا ہے منظور کاکا کو آغا سراج درانی نے کے بی سی اے میں ملازمت دلائی پھر وہ کرپشن کا بادشاہ بن گیا اوراربوں روپے کمائے جس میں سے آصف زرداری کو بھی حصہ جاتا تھا۔

اپنی رہائش گاہ پر پریس کانفرنس کرتے ہوئے ڈاکٹرذوالفقارمرزا نے کہا کہ میں اپنی اہلیہ کے ہمراہ علاج کی غرض سے امریکا جارہا ہوںفرار نہیں ہورہا، واپس آکر اسی طرح کرپٹ لوگوں کے خلاف بھرپور جدوجہد کروں گا اور اگر کسی میں دم ہے تو مجھے امریکا جانے سے روک لے۔ انہوں آصف زرداری نے7 سال تک مفاہمت کے نام پر نہ صرف عوام کو دھوکا دیا بلکہ لوٹ مار کا بازار گرم رکھا، آصف زرداری نے گزشتہ روز اس لیے بیان دیا ہے کہ وہ جیل جانا چاہتے ہیں تاکہ مظلوم بن جائیں جب کہ اب حساب دینے کا وقت آیا تو شور مچایا جارہا ہے۔

ذوالفقار مرزا کا کہنا تھا کہ جب میں وزیر تھا تو سب سے زیادہ تقرریوں اور تبادلوں کے احکام وزیراعلیٰ ہاؤس سے آتے تھے جو اب بلاول ہاؤس سے آتے ہیں۔ ایس بی سی اے پر رینجرز کے چھاپے سے متعلق انہوں نے کہا کہ منظور کاکا کو آغا سراج درانی نے کے بی سی اے میں ملازمت دلائی پھر وہ کرپشن کا بادشاہ بن گیا اوراربوں روپے کمائے جس میں آصف زرداری کو بھی حصہ جاتا تھا جب کہ اب مال کی بندربانٹ پر ہونے والے احتساب کو روکنے کے لیے شور مچایا جارہا ہے۔