اسنوکر ورلڈ کپ قسمت کے ہاتھوں مجبور پاکستان کا سفر تمام

آخری گروپ میچ میں آئرلینڈ کیخلاف فتح بھی کام نہ آئی جب کہ آسٹریلیا ہارکر بھی سرخرو فوٹو : فائل

---

پاکستان قسمت کے ہاتھوں مجبور ہوکر پروفیشنل اسنوکر ورلڈ کپ سے باہر ہوگیا، آئرلینڈ کو 4-1 سے ہرانے کے باوجود کوارٹر فائنل میں رسائی نہ مل سکی، ویلز سے شکست کے باوجود آسٹریلیا خوش قسمت رہا اور ایک فریم کے فرق سے اگلے مرحلے میں پہنچ گیا۔

چین میں جاری اسنوکر ورلڈ کپ میں پاکستانی ٹیم کا سفر ابتدائی راؤنڈ تک ہی محدود رہ گیا، گروپ سی کے آخری میچ میں اس نے مضبوط نارتھ آئرلینڈ کو4-1 سے ہرا دیا، اس سے امید پیدا ہوگئی کہ وہ اگلے مرحلے میں رسائی حاصل کرلے گی لیکن اسی گروپ میں شامل آسٹریلیا نے حیران کن طور پر ویلز کو 3-2 سے شکست دیدی، جس کی بدولت آسٹریلیا اور پاکستانی فتوحات کی تعداد 3,3 ہوگئی لیکن پاکستان نے 13فریمز جیتے جبکہ آسٹریلیا نے 14 میں کامیابی حاصل کی، اس کی وجہ سے ٹیم کا سفر ابتدائی راؤنڈ میں ہی تمام ہوگیا۔

حمزہ اکبر اور محمد سجاد پر مشتمل قومی ٹیم نے پانچ میں سے 3 میچز میں فتوحات حاصل کیں، اسے ابتدائی میچ میں ویلز نے 5-0 سے زیر کیا، دوسرے میں آسٹریلیا کیخلاف 3-2 سے کامیابی حاصل کی، تیسرے میچ میں پولینڈ نے حیران کن طور پر پاکستان کو 2-3 سے ہرادیا، ٹیم نے چوتھے میچ میں قطر اور پانچویں میں مضبوط نارتھ آئرلینڈ کی ٹیم کو شکست دی۔ یاد رہے کہ گروپ سی سے ویلز کے ساتھ آسٹریلوی ٹیم کوارٹر فائنل میں رسائی کی حقدار ٹھہری ، اسی طرح گروپ اے سے چین اے اور بھارت خوش نصیب رہے، گروپ بی سے بیلجیئم اور اسکاٹ لینڈ نے ابتدائی رکاوٹ عبور کی، گروپ ڈی سے چین کی بی اور انگلش ٹیموں نے لاسٹ ایٹ راؤنڈ میں قدم رکھا۔