کوپا امریکا چلی اور بولیویا نے کوارٹر فائنلز میں جگہ بنا لی

تنازع کا شکار برازیلین اسٹار نیمار پر 4 میچز کی پابندی عائد کردی گئی، فوٹو: فائل

---

کوپا امریکا فٹبال میں چلی نے بولیویا کو 5-0 سے کچل کر گروپ اے میں ٹاپ پوزیشن حاصل کرتے ہوئے کوارٹر فائنل میں جگہ بنالی، میکسیکو کیخلاف ایکواڈور کی 2-1 سے فتح نے بولیویا کو بھی آگے بڑھنے کا راستہ فراہم کردیا۔

تنازع کا شکار برازیلین اسٹار نیمار پر 4 میچز کی پابندی عائد کردی گئی، جس کے بعد اب ایونٹ میں ان کی مزید شرکت ممکن نہیں رہی۔تفصیلات کے مطابق جمعے اور ہفتے کی درمیانی شب منعقدہ کوپا امریکا فٹبال میں گروپ ' اے ' سے چلی نے بولیویا کو 5-0سے کچل کر ٹاپ پوزیشن پکی کرلی، شراب کے نشے میں دھت ہوکر کار حادثے سے دوچار ہونیوالے چلی کے سپراسٹار ویڈال نے کھیل کے ابتدائی 46 منٹ میں اپنی صلاحیتوں کے جوہردکھائے لیکن وہ کوئی گول بنانے میں کامیاب نہیں ہوسکے۔

چلی کیلیے چارلس ارینگوئز نے کھیل کے دوسرے منٹ میں کھاتہ کھولا، 36ویں منٹ میں الیکس سانچز نے بھی گیند کو جال کے سپردکرتے ہوئے ٹیم کی برتری 2-0 سے ہرادیا، ارینگوئز نے کھیل کے65ویںمنٹ میں انفرادی طور پر دوسرا گول داغ کر مقابلہ 3-0 کردیا، گیرے میڈال نے 78ویں منٹ میںبولیوین دفاعی حصارمیں نقب لگاتے ہوئے گیند کو جال میں پہنچاکر میزبان ٹیم کی برتری 4-0 کردی، چلی کو پانچواں گول حریف کپتان رونالڈ ریڈالز نے اون گول کی صورت تحفے میں پیش کیا۔

تاہم اس کے بعد گروپ کے دوسرے مقابلے میں میکسیکو کیخلاف ایکواڈور کی2-1 سے کامیابی نے بولیویا کو بھی کوارٹر فائنل میں پہنچادیا، فاتح ٹیم کیلیے بولانوز نے کھیل کے26 ویں منٹ میںپہلا گول بنایا، 57ویںمنٹ میں ویلنسیا نے برتری دگنی کردی، ناکام سائیڈ کا خسارہ کھیل کے 64ویں منٹ میں جیمنیز نے پنالٹی پر کم کیا۔