دیس بدیس کے کھانے

رمضان المبارک میں مختلف قسم کے کھانے بنائیے اور افطار کی رونقیں بڑھاتے جائیے۔:فوٹو؛ فائل

---

KARACHI: رمضان المبارک میں مختلف قسم کے کھانے بنائیے اور افطار کی رونقیں بڑھاتے جائیے۔

پسندے کباب پراٹھا

اجزا:

بیف پسندے (آدھا کلو)، دہی (ایک پاؤ)، گرم مسالا پاؤڈر (آدھا چائے کا چمچا)، تلی ہوئی پیاز (دو کھانے کے چمچے) پیس لیں، ادرک اور لہسن کا آمیزہ (ایک چائے کا چمچا)، کچا پپیتا (ایک چائے کا چمچا)، لال مرچ پاؤڈر (ایک چائے کا چمچا)، ہری مرچ (چار عدد)، ہرا دھنیا (آدھی پیالی)، تیل (حسب ضرورت)، نمک (حسب ذائقہ)

ترکیب:

دہی کو پھینٹ کر اس میں تیل، ہری مرچ اور ہرے دھنیا کے تمام مسالے شامل کر کے چار سے چھے گھنٹے کے لیے فریج میں رکھ دیں۔ اس کے بعد تیل گرم کر کے پسندے مسالوں سمیت ڈال کر ہلکی آنچ پر چھوڑ دیں۔ جب پانی خشک ہو جائے اور پسندے گل جائیں، تو اچھی طرح بھون لیں۔ اس کا مسالا خشک رکھیں، پھر ہرا دھنیا اور ہری مرچ ڈال کر دم پر رکھ دیں۔ اس کے بعد پراٹھے بنا کر تھوڑا پسندوں کا مسالا رکھیں اور رول کر دیں۔ اس کے بعد ہری چٹنی اور رائتے کے ساتھ پیش کریں۔

ڈبل روٹی کے بڑے

اجزا:

ڈبل روٹی کے توس (چار عدد)، دہی (آدھا کلو)، چاٹ مسالا (حسب ذائقہ)، شکر (چار کھانے کے چمچے یا حسب ذائقہ)، گھی (تلنے کے لیے)

ترکیب:

ڈبل روٹی کے ایک توس کے چار، چار ٹکڑے کر لیں۔ اس کے بعد اسے ہلکے ہلکے گھی میں فرائی کر کے ٹھنڈا کرنے رکھ دیں۔ دہی میں شکر ڈال کر اچھی طرح پھینٹ لیں۔ پیش کرنے سے دس منٹ پہلے ٹرے نما برتن میں ڈبل روٹی کے تلے ہوئے ٹکڑے بچھائیں۔ اس کے بعد اوپر سے دہی ڈالیں اور اوپر سے چاٹ مسالا چھڑک کر میٹھی چٹنی کے ساتھ پیش کریں۔

گھونسلہ کباب

اجزا:

گوشت کی بوٹیاں (آدھا کلو)، ابلے ہوئے آلو (ایک پاؤ)، لال مرچ پاؤڈر (ایک چائے کا چمچا)، نمک (حسب ذائقہ)، ادرک لہسن کا آمیزہ (آدھا چائے کا چمچا)، ہرا دھنیا، ہری مرچ اور پودینہ (حسب ضرورت)، کُٹی ہوئی کالی مرچ (دو چٹکی)، انڈہ (ایک عدد)، باریک سویاں (ایک پیالی) باریک کاٹ لیں، تیل (تلنے کے لیے)

ترکیب:

گوشت کو ادرک لہسن اور تھوڑا نمک ڈال کر ابال لیں۔ گلنے پر پانی خشک کر لیں، پھر ٹھنڈا کر کے پیس لیں، پھر آلو بھی پیس کے اس میں گوشت، کالی مرچ، لال مرچ، باریک کُٹا ہوا ہرا دھنیا، پودینہ اور ہری مرچ اچھی طرح ملا لیں، پھر اسے من چاہی شکل کے کباب بنالیں، پھر ان کو انڈے میں بھگو کر سویوں میں رول کر لیں۔ اور پندرہ منٹ فریج میں رکھ دیں۔ اس کے بعد نیم گرم تیل میں گولڈن براؤن ہونے تک تل لیں اور گرما گرم پیش کریں۔

رینبو فروٹ چاٹ



اجزا:

خربوزہ (ایک عدد) چھوٹا، پپیتا (ایک عدد) درمیانہ، تربوز (ایک عدد) درمیانہ، چینی، نمک اور لیموں کا رس (حسب ضرورت)

ترکیب:

تینوں پھلوں کو درمیان سے کاٹ لیں، پھر آئس کریم اسکوپ سے ان کی بالز نکال لیں۔ اب ایک علیحدہ پیالے میں لیموں، نمک اور چینی ملا لیں، پھر ایک بڑے ٹرانس پیرنٹ پیالے میں تمام بالز اور لیموں کا آمیزہ ڈال کر ملائیں اور فریج میں ٹھنڈا کر کے افطار میں پیش کریں۔

فلاور سینڈوچ

اجزا:

ڈبل روٹی (بارہ توس)، چکن مایونیز (ایک پیالی)، سادہ مایونیز (ایک پیالی)، ابلے ہوئے انڈے (چار عدد )، تازہ کریم (ایک پیالی)، کھانے کا رنگ (حسب ضرورت)، پنیر (ایک بڑا پیکٹ)، چاکلیٹ (حسب ضرورت) کدو کش کر لیں، نمک کالی مرچ (حسب ذائقہ)

ترکیب:

ایک پیالے میں ابلے ہوئے انڈے کچل کر مایونیز میں ملا لیں۔ نمک کالی مرچ بھی ملا لیں، پھر ایک توس پر چکن مایونیز لگائیں، اس پر دوسرا توس رکھیں اور اس دوسرے توس پر انڈے والا مایونیز لگالیں۔ پھر اس پر تیسرا توس رکھیں اور اس کے اوپر کریم لگائیں، پھر اس کو پنیر یا چاکلیٹ سے گارنش کر لیں۔ اس طرح تمام سینڈوچ تیار کر کے فلاور کٹر سے کاٹ کر پیش کر دیں۔

آئس چاکلیٹ ٹرائفل

اجزا:

آئس کریم (ڈیڑھ لیٹر پیک)، کاک ٹیل فروٹ ٹن (ایک عدد)، چاکلیٹ کدو کش کی ہوئی (ایک پیالی)، براؤنی (دو عدد)، پیلی، ہری اور لال جیلی (جما کر ٹکڑوں میں کاٹ لیں)، تازہ کریم (ایک پیالی)

ترکیب:

براؤنی کو چھوٹے چھوٹے ٹکڑوں میں کاٹ لیں۔ آئس کریم کو پیالے میں نکال کر فریزر کے بہ جائے فریج میں رکھیں، تاکہ وہ کچھ نرم ہو جائے۔ اب ایک ٹرے نما ایک شفاف ڈش میں ایک تہ آئس کریم کی اور پھر براؤنی اور فروٹ کاک ٹیل کی اس کے بعد باقی بچی ہوئی آئس کریم کی ایک تہ لگائیں۔ اوپر سے فریش کریم کی ایک تہ لگائیں اور پھر جیلی اور کدوکش کی ہوئی چاکلیٹ سے گارنش کر کے خوب ٹھنڈا کر کے پیش کریں۔