ہتھیار پھینک کر قومی دھارے میں شامل ہونیوالوں کے ساتھ تعاون کریں گے سربراہ پاک فوج

ایف سی اور پولیس کی کارروائیوں سے صوبے میں فرقہ واریت میں کمی واقع ہوئی، آرمی چیف فوٹو: فائل

---

آرمی چیف جنرل راحیل شریف نے تشدد کا راستہ چھوڑنے والوں کا خیر مقدم کرتے ہوئے کہا کہ ہتھیار پھینک کر قومی دھارے میں آنے والوں کے ساتھ مکمل تعاون کریں گے۔



آئی ایس پی آر کے مطابق آرمی چیف جنرل راحیل شریف نے کوئٹہ میں ہیڈ کوارٹر سدرن کمانڈر کا دورہ کیا جہاں انہیں بلوچستان میں سیكیورٹی اور امن وامان كی صورتحال پر تفصیلی بریفنگ دی گئی جب کہ اس موقع پر سول اورفوجی حكام بشمول چیف سكریٹری،آئی جی ایف سی بلوچستان اور آئی ایس آئی كے سربراہ بھی موجود تھے۔ ترجمان پاک فوج کے مطابق آرمی چیف کو بریفنگ میں بتایا گیا كہ بلوچستان میں امن و امان كی صورتحال بہتر ہوئی ہے اور ایف سی اور پولیس كی جانب سے دہشت گردوں اور دیگر مجرموں كے خلاف كامیاب آپریشنز كی وجہ سے جرائم كی شرح كم واقع ہوئی ہے۔





آرمی چیف جنرل راحیل شریف نے اس موقع پر صوبے میں امن و امان كی صورتحال میں نمایاں بہتری لانے پر ایف سی اور قانون كا نفاذ كرنے والے دیگر اداروں كی تعریف كی۔ انہوں نے صوبائی حكومت كو ہر ممكن تعاون كا یقین دلاتے ہوئے کہا کہ دیرپا امن، ترقی اور خوشحالی كے لیے كوشاں بلوچ عوام كا پورا ساتھ دیا جائے گا، سول اور فوجی تعاون اور مشتركہ اقدامات سے ہی بلوچستان كے ایك توانائی اور تجارتی محور كے طور پر ابھرنے كا خواب شرمندہ تعبیر ہوسكتا ہے۔انہوں نے ان لوگوں كا بھی خیر مقدم كیا جنہوں نے تشدد كا راستہ ترك كركے ہتھیار ڈالے۔



پاک فوج کے سربراہ کا کہنا تھا کہ یہ بات بڑی حوصلہ افزا ہے كہ علیحدگی پسند عناصر دوبارہ قومی دھارے میں شامل ہورہے ہیں ان افراد كی بحالی كے لیے ہر ممكن تعاون كیا جائے گا تاكہ یہ ایك پر امن اور با مقصد زندگی گزار سكیں۔ جنرل راحیل شریف نے بلوچستان كی طول و عرض میں سڑكوں كا جال بچھانے پر فرنٹیئر وركس آرگنائزیشن (ایف ڈبلیو او)كی كوششوں اور اقدامات كی تعریف کرتے ہوئے کہا کہ انہوں نے نامساعد حالات كے باوجود یہ كارنامہ سر انجام دیا جو لائق تحسین ہے جب کہ آرمی چیف نے رواں منصوبوں كی بروقت تكمیل اور اس دوران معیار كو یقینی بنانے كی بھی ہدایت كی۔