شین وارن کی منتخب الیون مشتاق احمد پر آفریدی کو ترجیح دینا پڑگئی

1990 سے 2015 کے دورانیے میں کھیلنے والے پلیئرز میں سے 11 کاچناؤ فوٹو: فائل

---

سابق آسٹریلوی لیگ اسپنر شین وارن نے ایک ویب سائٹ کیلیے دنیا کی تمام ٹیموں کی گذشتہ 25 سال کی بہترین سائیڈ مرتب کرنے کا سلسلہ شروع کیا ہے، وہ اب تک آسٹریلیا، انگلینڈ اور جنوبی افریقہ کی بہترین ٹیموں کا انتخاب کر چکے ہیں ، انھوں نے حال ہی میں پاکستان کی بہترین الیون مرتب کی ہے۔

1990 سے لیکر 2015 تک پاکستان کی بہترین ٹیم کا انتخاب کرنے والے شین وارن نے کہا کہ میں نے اس میں ان ہی پلیئرز کو شامل کیا ہے جن کیخلاف میں کھیلا ہوں یا میں نے جنھیں کھیلتے ہوئے دیکھا ہے، عالمی کرکٹ میں ایک ہزار وکٹیں اپنے نام کرنے والے مایہ ناز سابق اسپنر نے کہا کہ میں نے اپنی ٹیم میں رچرڈ ہیڈلی، عمران خان اور ای ین بوتھم جیسے عظیم کھلاڑیوں کے خلاف بہت کم کھیلا یا بالکل نہیں کھیلا، اس لیے انھیں ٹیم کا حصہ نہیں بنایا گیا لیکن جب میں سب سے آخر میں اپنی منتخب کردہ دنیا کی بہترین ٹیسٹ ٹیم تشکیل دوں گا تو اس میں مجھے یقین ہے کہ یہ کھلاڑی شامل ہوں گے۔

پاکستان کی الیون منتخب کرنے کے حوالے سے شین وارن نے مزید کہا کہ اس ٹیم میں متعدد بہترین کھلاڑی جگہ نہ بنا سکے اور سب سے مشکل کام اپنے دوست اور بہترین لیگ اسپنر مشتاق احمد کو اس ٹیم سے باہر کرنا تھا لیکن میں نے لیگ اسپن آل راؤنڈر ہونے کی وجہ سے شاہد آفریدی کا انتخاب کیا ورنہ میں ثقلین، وقار یونس یا شعیب اختر میں سے کسی کی جگہ انھیں منتخب کرتا، اس کے علاوہ آل راؤنڈر عبدالرزاق اور اظہر محمود کو بھی اس ٹیم سے باہر کرنا بہت مشکل تھا لیکن یہ ایک انتہائی باصلاحیت ٹیم تھی،شین وارن کی منتخب کردہ پاکستان کی بہترین ٹیم ان کھلاڑیوں پر مشتمل ہے، وسیم اکرم (کپتان)، سعید انور، عامر سہیل، یونس خان، انضمام الحق، محمد یوسف، شاہد آفریدی، معین خان، ثقلین مشتاق، شعیب اختراور وقار یونس۔