نظام صلوٰۃ کا کلینڈر جاری ملک بھر میں نماز جمعہ ڈیڑھ بجے ہوگی

سرکاری میڈیا پر اذان نشرکرنے کیلیے بات کی جارہی ہے، نظام صلوٰۃ پورے ملک میں نافذکیاجا رہاہے وزیرمذہبی امور سرداریوسف۔ فوٹو: فائل

---

LONDON: وزارت مذہبی امور نے نظام صلوٰۃ کے حوالے سے یکم جنوری 2016 سے 31 دسمبر 2016 تک نمازوں کے اوقات پرمبنی ترمیم شدہ کیلنڈر جاری کردیا ہے۔

وزیر مذہبی امورسرداریوسف نے یہ کیلنڈرایک تقریب میں جاری کیا، مذکورہ کیلنڈرکے تحت سال بھرپورے ملک میں جمعے کی نماز ڈیڑھ بجے ادا ہوگی۔ اس موقع پر سردار یوسف نے بتایا کہ سرکاری میڈیاپر اذان نشر کرنے کے حوالے سے وزارت اطلاعات سے بات چیت کی جا رہی ہے۔ انھوں نے کہا کہ نظام صلوٰۃ اسلام آباد کے ساتھ ساتھ پورے ملک میں نافذ کیاجارہاہے، اس حوالے سے نظام صلوٰۃ کمیٹی کا کرداراہم ہے۔ نظام صلوٰۃ کمیٹی میں مولاناعبد العزیز، مولانا ضمیر احمد ساجد، ہاورن رشید، عرفان مفتی، حافظ شیرازی، حفیظ الرحمٰن، سجاد نقوی اور مولانا ہادی شامل ہیں۔

سرداریوسف نے بتایاکہ ملک کے تعلیمی اداروں میں بھی نماز کے اوقات پر عملدرآمد کرایا جائے گا، دارالحکومت کی 900 مساجد میں نظام صلوٰۃ کا کیلنڈر بھجوا دیا گیا ہے جومساجد میں آویزاں کیاجائے گا۔