ماسٹرز چیمپئنز لیگ آغاز سے قبل ہی تنازعات کا شکار

حاضر سروس کھلاڑیوں کو لبھانے کا الزام،آئی سی سی نے معاملے کا نوٹس لے لیا. فوٹو: فائل

---

ماسٹرز چیمپئنز لیگ آغاز سے قبل ہی تنازعات کی زد میں آگئی اور اس پر حاضر سروس کھلاڑیوں کو لبھانے کا الزام عائد ہوگیا۔

تفصیلات کے مطابق ماسٹرز چیمپئنز لیگ کا آغاز آئندہ جمعرات کو دبئی میں ہورہا ہے جس میں کھیل سے جڑے بڑے نام ایک بار پھر ایکشن میں دکھائی دیں گے، مگر آغاز سے قبل ہی ایونٹ کے حوالے سے اعتراضات اور تحفظات سامنے آنا شروع ہوگئے ہیں، ایک خلیجی اخبار کے مطابق کچھ فل ممبران نے لیگ میں حصہ لینے والے کھلاڑیوں کے اسٹیٹس غیریقینی ہونے کی شکایت کردی، خود انٹرنیشنل کرکٹ کونسل بھی لیگ کے حوالے سے اب غیرمطمئن دکھائی دے رہی ہے۔

اس کی جانب سے اپنے ممبرز کو ای میل کے ذریعے کہا گیاکہ اگر کوئی حاضر سروس یا ریٹائرمنٹ نہ لینے والا کھلاڑی ایم سی ایل میں حصہ لینے کے لیے این او سی لینا چاہے تو اسے مطلع کریں۔ کونسل نے ایم سی ایل کی منظوری امارات کرکٹ بورڈ کی جانب سے ایونٹ کو قبول کرنے اور اس کے صرف ریٹائرڈ کرکٹرز تک محدود ہونے کی بنیاد پر دی تھی، مگر اب لیگ کی جانب سے موجودہ کرکٹرز کی خدمات حاصل کرنے کی کوششوں کا دعویٰ کیا جارہا ہے۔

ایسے کھلاڑیوں میںرچرڈ لیوی، فیڈل ایڈورڈز، کرشمار سانتوکی، گراہم اونینز اور کئی دیگر شامل ہیں۔ تحفظات ظاہر کرنے والوں میں پاکستان اور ویسٹ انڈین کرکٹ بورڈ موجود ہیں جبکہ ایک اور بورڈ نے بھی تشویش ظاہر کی ہے۔ گذشتہ دنوں پی سی بی کی جانب سے واضح کیا گیا تھا کہ این او سی صرف ان کھلاڑیوں کو جاری کیا جائے گا جو ریٹائرمنٹ کا اعلان کریں گے، حکام کو خاص پر ایونٹ کے ساتھ عبدالرزاق کی وابستگی پر غصہ ہے۔

وہ ایم سی ایل کو اپنی پاکستان سپر لیگ کی حریف خیال کرتے ہیں۔ دوسری جانب ایم سی ایل کے منتظمین کا کہنا ہے کہ ہم اس حوالے سے آئی سی سی سے رابطے میں ہیں، لیگ کو اس قسم کے سخت ایشوز کا سامنا کرنا پڑسکتا ہے، ویسے یہ کھیل سے دور کرکٹرز کیلیے مناسب وقت ہے کہ وہ آفیشل طور پر اپنی ریٹائرمنٹ کا اعلان کردیں۔