ورلڈ ٹی 20 پاکستان اور بھارت کے بیٹسمینوں میں اصل مقابلہ

دھرم شالا کے کیوریٹرنے ہائی وولٹیج میچ کے ہائی اسکورنگ رہنے کی نوید سنا دی فوٹو : فائل

---

ورلڈ ٹوئنٹی 20 میں اصل مقابلہ پاکستان اور بھارت کے بیٹسمینوں میں ہوگا، دھرم شالا کے کیوریٹر سنیل چوہان نے ہائی وولٹیج میچ کے ہائی اسکورنگ رہنے کی نوید سنا دی، انھوں نے کہا کہ وکٹ میں رنز کا خزانہ چھپا اور آئوٹ فیلڈ فاسٹ ہوگی، دیکھنے والوں کو ٹی 20 کا حقیقی لطف آجائے گا۔

تفصیلات کے مطابق ورلڈ ٹوئنٹی 20 میں روایتی حریف پاکستان اور بھارت کے درمیان میچ 19 مارچ کو دھرم شالا کے ہماچل پردیش کرکٹ اسٹیڈیم میں کھیلا جائے گا، وہاں ہائی وولٹیج میچ کیلیے ایسی وکٹ تیار کی جا رہی ہے جو بیٹسمینوں کی جنت ثابت ہوگی، جس ٹیم کے بیٹسمین جتنی زیادہ پاور ہٹنگ کا مظاہرہ کریں گے وہی بازی مارلیں گے۔

کیوریٹر سنیل چوہان نے کہاکہ ٹوئنٹی 20 مقابلوں کیلیے سب کو معلوم ہی ہے کہ وکٹ کیسی ہونی چاہیے، یہ بھی مختلف نہیں اوریہاں پر بیٹسمینوں کا راج ہوگا، جس قسم کی پچ ہم تیار کرنے لگے ہیں اس پر ہائی اسکورنگ مقابلے کی ہی توقع کی جا سکتی ہے۔ چوہان نے وکٹ پورے میچ کے دوران ایک جیسی رہنے کا بھی دعویٰ کیا، انھوں نے کہا کہ میچ کے پورے 40 اوورز کے دوران وکٹ ایک جیسی ہی ثابت ہوگی مگر آئوٹ فیلڈ فاسٹ ہوتی جائے گی۔

ہم اسے ریت اور قدرتی کھاد سے تیار کررہے ہیں، اس ماہ کے آخر تک پورا گرائونڈ سرسبز دکھائی دے گا جبکہ پچ کی تیاری ہم 24 فروری سے شروع کریں گے۔ یاد رہے کہ دھرم شالا میگا ایونٹ کے 6 کوالیفائنگ میچز کی بھی میزبانی کرے گا جو9 سے 13 مارچ تک کھیلے جائیں گے، یہاں پاک بھارت میچ سے ایک روز قبل 18 مارچ کو آسٹریلیا اور نیوزی لینڈ کی ٹیمیں بھی مدمقابل ہوں گی، دونوں میچزکے درمیان ہائوس فل کی توقع ظاہر کی جا رہی ہے۔