پاکستانی بیٹنگ کوچ اپنے ’شاگردوں‘ کی کارکردگی پر نالاں

آج بھی فارم برقرار رکھنے کی کوشش کرونگادیگر کھلاڑی بھی پراعتمادہیں، عمر اکمل۔ فوٹو: فائل

---

پاکستان ٹیم کے بیٹنگ کوچ گرانٹ فلاور نے اپنے شاگردوں کی پرفارمنس پر عدم اطمینان ظاہر کردیا۔

میڈیا سے بات کرتے ہوئے انھوں نے کہاکہ یو اے ای کے خلاف میچ میں ابتدائی 3 وکٹیں گرنے کے بعد شعیب ملک اور عمر اکمل کی اچھی بیٹنگ کی بدولت میچ جیت گئے جس کی خوشی ہے لیکن ہماری کارکردگی اس سے بہت بہتر ہوسکتی تھی۔ گرانٹ نے کہاکہ قومی ٹیم ٹیسٹ کرکٹ میں بہترین، ون ڈے میں بہتری کی کوشش ہورہی ہے، بیٹسمینوں سے پوچھا ہے کہ انھیں کسی قسم کا خوف یا پریشر تو نہیں لیکن ان کا جواب نفی میں ہے، کھلاڑیوں کے ساتھ میٹنگ میں انھیںخامیاں بھی بتائی ہیں لیکن وہ میدان میں جاکر مشوروں پر عمل در آمد نہیں کرتے۔

گرانٹ فلاور نے امید ظاہر کی کہ بنگلہ دیش کیخلاف بدھ کے میچ سمیت دیگر ٹیموں کے خلاف گرین شرٹس اچھی کارکردگی کا مظاہرہ کرینگے۔ دریں اثنا عمر اکمل بنگال ٹائیگرز پر بھی اپنی بیٹنگ کی دھاک بیٹھانے کو پراعتماد ہیں، ان کا کہنا ہے کہ بنگلہ دیش کیخلاف اہم میچ میں اپنی فارم برقرار رکھنے کی کوشش کروں گا، پوری ٹیم اپنی صلاحیتوں کا 100فیصد اظہار کرنے کیلیے پر عزم ہے۔

عمر اکمل نے کہاکہ اس میں کوئی شک نہیں کہ ہماری بیٹنگ ناکام رہی، یو اے ای کے مقابل بھی دباؤ کا شکار ہوگئے تھے لیکن شعیب ملک کیساتھ میری شراکت نے حالات ہمارے حق میں کردیے، ساتھی آل راؤنڈر کو اس اننگز کا زیادہ کریڈٹ دوں گا، ٹیم مینجمنٹ نے ہمیں جو اعتماد دیا تھا اس کی وجہ سے اچھی کارکردگی کا مظاہرہ کرسکے، بنگلہ دیش کیخلاف میچ میں اپنی فارم برقرار رکھتے ہوئے اچھی پرفارمنس دکھانے کی کوشش کروں گا تاکہ ایونٹ میں پیش قدمی جاری رکھیں۔