امریکا مداخلت سے باز رہے ہر جارحیت کو ناکام بنا دینگے شمالی کوریا

سیئول:جنوبی کوریا کے شہری شمالی کوریا کیخلاف پیانگ یانگ کی اشتعال انگیزی پر اسے ’’ سزادو‘‘کی تحریر والے پلے کارڈ اٹھائے احتجاج کر رہے ہیں۔ فوٹو : اے ایف پی

---

شمالی کوریا نے کہا ہے کہ ہر قسم کی جارحیت کو ناکام بنانے کی صلاحیت رکھتے ہیں۔

اپنی آزادی اور خود مختاری کا تحفظ کرنا جانتے ہیں،خطے کی سلامتی کیلیے اپنا کردار نبھانے کیلیے تیار ہیں ۔کسی بھی جارحیت کا منہ توڑ جواب دیا جائے گا ۔پیانگ یانگ میں محکمہ خارجہ کے اعلیٰ عہدیدار نے سرکاری خبررساں ایجنسی کو بتایا کہ جنوبی کوریا کے عزائم کو سمجھتے ہیں اور اس پر نظر رکھے ہوئے ہیں ۔انھوں نے کہا کہ امریکا بھی مداخلت سے باز رہے ۔ادھر فورسز نے خبر دار کیا ہے کہ اگر جنوبی کوریا نے ایک سرحدی جزیرے پر پروگرام کے مطابق فوجی مشق کی تو وہ اس پر گولہ باری کریں گے جس کی اطلاع سرکاری خبررساں ایجنسی نے گزشتہ روز دی ہے ۔

اس میں کہا گیا تھا کہ جنوبی کوریا یوان پیانگ جزیرے پر ایک فوجی مشق کرنے کا ارادہ رکھتا ہے اس جزیرے پر شمالی کوریا نے 2010 ء میں گولہ باری کی تھی جنوبی کوریا اس حملے کے دو سال مکمل ہونے پر اس جزیرے پر فوجی مشق کرنیوالا ہے ۔بتایا گیا ہے کہ اس حملے کی وجہ سے مکمل جنگ چھڑنے کے خدشات پیدا ہوگئے تھے ۔شمالی کوریا کا کہنا ہے کہ اگر جنوبی کوریا نے کوئی ایسا اقدام اٹھایا تو اس پر بلا تاخیر کارروائی کی جائے گی ۔فوج ملکی دفاع اور سلامتی کیلیے اپنی صلاحیتوں کو بروئے کار لاتے ہوئے کوئی بھی جوابی اقدام کرنے کا حق رکھتی ہے ۔