دوسری تیز ترین سنچری لوکیش فاف ڈوپلیسی کے ساجھے دار بن گئے

اسٹورٹ بنی کی خوب خبر لیتے ہوئے اوور میں پانچ چھکے جڑکر32 رنز بٹور لیے۔ فوٹو: فائل

---

بھارتی اوپنر لوکیش راہول ٹی ٹوئنٹی کرکٹ کی دوسری تیز ترین سنچری کے ریکارڈ میں ڈوپلیسی کے ساجھے دار بن گئے، انھوں نے گذشتہ روز ویسٹ انڈیز کیخلاف صرف 46 بالز پر یہ اعزاز پایا۔

تیزترین سنچری کا ریکارڈ جنوبی افریقہ کے رچرڈ لیوی کے پاس ہے، انھوں نے 2012 میں نیوزی لینڈ کیخلاف صرف 45 گیندوں پر تہرے ہندسوں میں رسائی حاصل کی تھی، جنوبی افریقی فاف ڈوپلیسی بھی 46جب کہ آسٹریلوی آرون فنچ 47 گیندوں پر سنچریاں بنا چکے، گذشتہ روز ہی ویسٹ انڈین اوپنر ایون لیوس نے 48 بالز پر سنچری مکمل کی، کرس گیل 47 بالز پر سنچری کے کیریبیئن ریکارڈ کے حامل ہیں۔

میچ میں بھارتی پیسر اسٹورٹ بنی کی لوئس نے خوب خبر لی اور ایک اوور میں 32 رنز بٹور لیے، اس میں 5 چھکوں اور سنگل سمیت ایک وائیڈ بھی شامل رہی، 2007 میں بھارت کے یوراج سنگھ نے انگلش پیسر اسٹورٹ براڈ کو 6 چھکے رسید کر کے اوور میں سب سے زیادہ رنز کا ریکارڈ بنایا تھا۔ کیریبیئن سائیڈ نے گذشتہ روز ابتدائی 10اوورز میں 132 رنز بنائے، ٹی ٹوئنٹی کی تاریخ میں پہلے بیٹنگ کرنے والی کسی بھی ٹیم کا یہ سب سے بڑا اسکور ہے، اس سے قبل 2009 میں جنوبی افریقہ نے انگلینڈ سے میچ میں 131 رنز بنائے تھے۔

ویسٹ انڈیز کے 6 وکٹ پر245 رنز ٹی ٹوئنٹی کا تیسرا بڑا اسکور ثابت ہوا، سب سے زیادہ 260/6 رنز سری لنکا نے 2007 میں کینیا کیخلاف بنائے تھے،آسٹریلیا نے 2013میں انگلینڈ سے میچ میں 248/6 کا مجموعہ پایا تھا۔ ویسٹ انڈیز نے اننگز میں سب سے زیادہ 21 چھکوں کا ریکارڈ بھی قبضے میں کر لیا، اس سے قبل نیدرلینڈز نے آئرلینڈ کیخلاف 2014میں 19 چھکے لگائے تھے۔