اچھا ہے کہ والد آج زندہ نہیں ورنہ وہ لوگوں کی باتوں پر بہت دکھی ہوتے شاہ رخ خان

اداکاراپنی نئی آنے والی فلم "دی رنگ" کی شوٹنگ کے لیے ایمسٹرڈیم میں ہیں: فوٹو: فائل

---

MUMBAI: بالی ووڈ کنگ شاہ رخ خان جو سوشل میڈیا ویب سائٹس پر اپنے مداحوں کے ساتھ اپنی ذاتی زندگی سے لے کر اپنے فلمی پراجیکٹس کو بھی شئیر کرتے ہیں اور اپنی زندگی کے اچھے اور برے لمحات سے بھی انہیں آگاہ کرتے ہیں تاہم اب اداکار اپنے ایک ٹوئٹ میں خاصے غم زدہ لگ رہے ہیں جہاں انہوں نے لکھا کہ اچھا ہے کہ میرے والد آج زندہ نہیں۔

سماجی رابطے کی ویب سائٹ ٹوئٹرپربالی ووڈ کنگ شا ہ رخ خان نے اپنے والد کی ایک نصیحت کو یاد کرتے ہوئے لکھا کہ وہ ہمیشہ اپنے "فریڈم فائٹر والد" میر تاج محمد کی اس نصیحت پرعمل کرتے ہیں کہ آپ جتنے خاموش رہنے والے ہوجاتے ہیں اتنے ہی زیادہ آپ سننے کے قابل ہوجاتے ہیں۔ اداکارنے کہا کہ اچھا ہوا کہ آج ان کے والد زندہ نہیں ہیں کیونکہ وہ کچھ لوگوں کی باتیں سن کربہت زیادہ دکھی ہوجا تے۔

I follow my Freedom Fighter father’s advice ‘quieter u bcome the more u r able 2 hear’.Good he’s no more, he’d be sad 2 hear wot sum ppl say

— Shah Rukh Khan (@iamsrk) September 19, 2016

اداکارنے اپنے ٹوئٹ میں یہ واضح نہیں کیا کہ ان کا اشارہ دراصل کن لوگوں کی جانب ہے یا وہ کون سے لوگ ہیں جو ان کے بارے میں ایسا کہتے ہیں کہ جن سے ان کے والد بھی دکھی ہوجاتے۔

واضح رہے کہ اداکاراپنی نئی آنے والی فلم "دی رنگ" کی شوٹنگ کے لیے ایمسٹرڈیم میں ہیں جب کہ فلم میں ان کے ہمراہ اداکارہ انوشکا شرما بھی مد مقابل نظرآئیں گی۔