حکومت کراچی کے حالات خراب کرکے انتخابات ملتوی کرنا چاہتی ہے قادر مگسی

قادر مگسی نے کہا کہ وطن کارڈ کے ذریعے لوگوں کو فقیر بنایا جارہا ہے۔ فوٹو: فائل

---

حکومت سندھ کو تقسیم کرکے اپنی بالادستی قائم کرنا چاہتی ہے،14دسمرب حیدرآباد کے جلسے کے بعد حکومت بوکھلاہٹ کا شکار ہوگئی، کراچی میںحالات خراب کرکے عام انتخابات ملتوی کرنا چاہتی ہے۔

ان خیالات کا اظہار سندھ ترقی پسند پارٹی کے چیئرمین ڈاکٹر قادر مگسی نے پارٹی رہنما شہید لیاقت علی ملاح کی برسی کے موقع پر جلسہ عام سے خطاب کرتے ہوئے کیا، انہوں نے کہا کہ حکومت اپنی اتحادی پارٹی کے ساتھ ملکر سندھ کو2 حصوں میں تقسیم کرنے کی پالیسی پر گامزن ہے جس سے پیپلز پارٹی کی بالادستی قائم ہوجائیگی جواس کی بھول ہے سورھیہ بادشاہ کے وارث سندھ دھرتی کو کبھی تسیم نہیں ہونے دیں گے، حکومت ہمیں غدار کہتی ہے لیکن تاریخ گواہ ہے پیپلز پارٹی نے ملک کو 2 حصوں میں تقسیم کیا، 14دسمبر حیدرآباد کے جلسے کے بعد حکومت بوکھلاہٹ کا شکار ہوگئی ہے۔

انہوں نے مزید کہا کہ کراچی کے خراب حالات پری پلاننگ کا حصہ ہے، ایسے حالات پیدا کرکے حکومت انتخابات ملتوی کرنا چاہتی ہے۔ انہوں نے کہا کہ محترمہ شہید بینظیر بھٹو سندھ کی بیٹی تھی اس کے قاتلوں کو سرعام پھانسی دلانے تک چین سے نہیں بیٹھیں گے۔



انہوں نے کہا کہ سندھ قدرتی وسائل سے مالا مال ہے لیکن سندھ کے لوگ بھوک افلاس، بیروزگاری، سے خودکشی کرنے پر مجبور ہیں، وطن کارڈ کے ذریعے رقم تقسیم کرکے حکومت لوگوں کو فقیر بنانا چاہتی ہے۔

انہوں نے کہا کہ بدین، ٹھٹھہ میں3 سال کا عرصہ گزرنے کے باوجود پانی کی نکاسی نہیں ہوسکی جس سے لوگ پریشان ہیں ، اس موقع پر ترقی پسند پارٹی کے مرکزی رہنما نصرت چنا، جام شوکت ابڑو، علی ڈنو مگسی، دل مراد ڈھانی فنکشنل مسلم لیگ کے اللہ بچایو نظامانی، صالح مگسی، اکبر ملاح دیگر نے بھی خطاب کیا، بعد ازاں پریس کلب سانگھڑ کے سابق صدر اسلم میمن کے والد محمد ابراہیم میمن کے انتقال پر ان کی رہائش گاہ پر تعزیت کی اس موقع پر صدر میمن درس، محمد حسن ابڑو، صغیر احمد راجپوت، حاجی عبدو جیلانی، اختر قریشی، ڈاکٹر امیر بخش، ہوش محمد ، سرور بلوچ و دیگر معززین بھی موجود تھے۔