کراچی میں ٹارگٹڈ آپریشن کا دائرہ وسیع کیا جائے صدر زرداری

ٹارگٹ کلنگ میں ہلاک افرادکے ورثاکومعاوضے کیلیے پالیسی بنانے کی ہدایت،الیکشن اتحادیوں کیساتھ مل کرلڑینگے،صدر،اجلاس سے خطاب. فوٹو: فائل

---

صدرزرداری نے کراچی میں ٹارگٹڈآپریشن کادائرہ مزیدکرنے کی ہدایت کردی ہے اور کہاہے کہ دہشت گردوںکاقلع قمع کرنے کیلیے جن وسائل کی ضرورت ہوگی،وہ وفاقی حکومت فراہم کرے گی۔

کراچی میں ٹارگٹ کلنگ کے دوران جاں بحق ہونے والے شہریوںکے ورثاکی مالی امدادکیلیے بھی موثر پالیسی تشکیل دی جائے۔یہ بات انھوں نے صدارتی کیمپ آفس بلاول ہائوس میںگورنرسندھ ڈاکٹرعشرت العباداوروزیراعلیٰ سندھ سیدقائم علی شاہ سے ملاقات میںگفتگوکرتے ہوئے کہی۔اس موقع پرپاکستان پیپلزپارٹی کے چیئرمین بلاول بھٹوزرداری بھی موجودتھے۔ ملاقات میں ملک کی مجموعی سیاسی صورتحال، امن و امان، ترقیاتی منصوبوں اوردیگرامور پر تفصیلی غورکیاگیا۔اس موقع پرصدرنے کہاکہ کراچی میں قیام امن حکومت کی اولین ترجیح ہے،کراچی ملک کامعاشی حب ہے،کراچی میں امن خراب کرنے کی کسی کو اجازت نہیں دی جائے گی،کراچی میں قیام امن کیلیے سیاسی قوتوںکوبھی اپناکرداراداکرناہوگا۔

قبل ازیں صدرسے گورنر سندھ ڈاکٹر عشرت العباد خان نے ون ٹو ون بھی ملاقات کی جس میں سیاسی صورتحال، پیپلز پارٹی اورمتحدہ قومی موومنٹ کے درمیان ورکنگ ریلیشن شپ اوردیگر امورپرغور کیا گیا۔ گورنر سندھ نے تاجروں کے مسائل اورعلمائے کرام سے ہونے والی ملاقاتوں کے حوالے سے صدرمملکت کو بریفنگ دی۔



صدر نے کہاکہ تاجر ملکی معیشت میں ریڑھ کی ہڈی کی حیثیت رکھتے ہیں، حکومت تاجروں کے تمام مسائل حل کرے گی اورانہیں ہر ممکن تحفظ فراہم کرے گی۔بعدازاں وزیراعلیٰ سندھ سید قائم علی شاہ نے بھی صدر سے ون ٹوون ملاقات کی اورسندھ میں امن وامان اورسیلاب متاثرین کے حوالے سے تفصیلی بریفنگ دی۔صدرنے کہا کہ کراچی سے بھتہ مافیااورٹارگٹ کلرزکے خلاف کاروائی کے لیے سخت اقدامات کیے جائیں۔

علاوہ ازیں شہیدبینظیربھٹوکی5ویں برسی کے انتظامات کے حوالے سے جائزہ اجلاس میںگفتگوکرتے ہوئے صدرزرداری نے کہاکہ آئندہ انتخابات مقررہ وقت پرہوںگے اوران انتخابات میںاتحادی جماعتوںکے ساتھ مل کرحصہ لیںگے،پیپلزپارٹی شہید بھٹواورشہید بینظیرکے ویژن کوپوراکرے گی،موجودہ حکومت نے ہمیشہ تمام مسائل اور چیلنجزکوبات چیت کے ذریعے حل کرنے کوشش کی ہے۔انھوں نے ہدایت کی کہ پیپلزپارٹی کے ارکان پارلیمنٹ عوام رابطوں کوبڑھائیں اورعوامی مسائل فوری حل کیے جائیں۔اس موقع پربلاول بھٹو زرداری نے کہا کہ پیپلزپارٹی عوامی قوت ہے،آئندہ انتخابات میں بھرپور کامیابی حاصل کریں گے۔ اجلاس میں وزیراعلیٰ سندھ سیدقائم علی شاہ،فریال تالپور،پیرمظہرالحق،سراج درانی،شرجیل میمن،اسلام الدین شیخ و دیگرنے شرکت کی۔